Жұмысшы мамандықтар жылына орай қарапайым еңбек адамдарына деген құрметті арттырып, оларға ілтипат білдіру шаралары жалғасын табуда. Бұл жолғы акцияны облыс орталығында – «Respublika» партиясы қоғамдық бірлестігі ұйымдастырды.
«Жаңа Адамдар – жаңа қадамдар» ұранымен құрылған «Respublika» партиясы аз ғана уақытта қоғамдық саяси өмірге етене араласып, ілкімді іс шаралардың бел ортасынан табылуда. Партияның жұмысшы мамандарға арналған акциясына қаламыздағы «Кеңгір» шипажайы қолдау білдіріп, демеушілік көрсеткен.
– Күннің ыстық-суығында еңбек етіп жүрген адамдарға осындай дәмді тағамдарымызды пісіріп жатырмыз. Қолымыздан келгенше осындай бастамаларға қолдау көрсетеміз. Бауырсақ, бәліштер пісіріп жатырмыз, – дейді «Кеңгір» шипажайының бас аспазы Қалдыгүл Ермекова.
Иә, жезқазғандық коммуналдық сала қызметкерлерінің бүгінгі жұмыс күні өзгеше басталды. «Республикалықтар» бұл күні 30-ға жуық жұмысшыға ыстық шай мен бауырсақ және дәмді бәліштер ұсынды.
Сондай-ақ оқыңыз
– Біздің осынау акциямызға өзге партия өкілдері де атсалысса дейміз. Себебі, жылдың төрт мезгілінде тынымсыз тірлік жасайтын жол тазалаушылардың еңбегі ескеруге тұрарлық! Оның үстіне қазір сапалы жұмысшы мамандарға деген сұраныс өте жоғары, – дейді «Respublika» партиясының мүшесі Ирина Морозова.
Партия белсенділері аталған бағыттағы шараларды өңірге қарасты өзге де елді мекендерде ұйымдастырмақ ниетте. Мұндағы негізгі мақсат: еңбек адамдары мен олардың жасаған жұмысына қоғамның назарын аудару!
Гүлім МАРАТҚЫЗЫ.
