Жезқазған қаласының әкімі Қайрат Шайжанов биыл жол жөндеу-ге қатысты жұмыстардың ерте қолға алынғанын әлеуметтік желі арқылы жұртшылыққа жария етті. Әкімнің айтуынша, қазір конкурс жарияланған. Наурыз айында оның қорытындылары шығып, мердігерлер анықталған соң сәуір айының ортасында жол жөндеу жұмыстары басталады.
Биыл жалпы ұзындығы 18 шақырым болатын 14 көшенің жолына орташа жөндеу жұмыстары жүргізіледі. Оның ішінде 10 көшенің жолына қиыршық тастымастикалық жабындымен асфальт-бетон материалы қолданылады. Қазір сметалық-техникалық құжаттар сараптамадан өтіп, оң нәтижесін алыпты. Жолдың орташа жөндеу жұмыстарына 4 млрд. 055 млн. теңге қаржы қарастырылып отыр.
Асфальт төселетін көшелер қатарында Алашахан даңғылы (Бейбітшілік даңғылынан Байқоңыров көшесіне дейін), Бейбітшілік даңғылы (Ғарышкерлер бақжолынан Деев көшесіне дейін), Момышұлы көшесі (Сейфуллин көшесінен Бейбітшілік даңғылына дейін), Сәтбаев көшесі (Абай көшесінен айналма жолға дейін), Сарыарқа көшесі (Ұлытау көшесінен А-16-ға дейін), Ұлытау көшесі (Сәтбаев көшесінен Абай көшесіне дейін), Абай көшесі (Сарыарқа көшесінен айналма жолға дейін), Шевченко көшесі (Аманжолов көшесінен Ғарышкерлер бақжолына дейін), Жанасов көшесі (Ұлытау көшесінен Байқоңыров көшесіне дейін), Қарағанды көшесі (Байқоңыров көшесінен Ұлытау көшесіне дейін), Желтоқсан
көшесі (Абай көшесінен ЖЭО бағдаршамына дейін), Садовое кольцо көшесі (Желтоқсан көшесінен Холмецкий көшесіне дейін), Қабанбай батыр шағын ауданының орталық көшесі, Строитель тұйық көшесі қамтылатын болады. Сонымен қатар, тұрғындар көптен бері көтеріп жүрген Қостанкелді және Бекболатсай ықшам аудандарының 5 көшесінің жолдарына жөндеу жүргізу жоспарланып отыр.
Биылғы жылдың тағы бір ерекшелігі, жөнделген жолдың кепілдік мерзімі 5 жылға дейін сақталады. Бұл жағдай мердігер ұйымдардың жұмыстарының
сапалы атқарылуына ықпалын тигізеді деп күтілуде.
Сондай-ақ оқыңыз
Амандық РАХҰЛЫ.
