Газет таратушылардың бас ауруына айналған мәселенің бірі – көп қабатты үйлердегі пошта жәшіктерінің жайі. «Айта, айта «Алтайды», Жамал апам қартайды» демекші, «газет келмей жатыр» деген оқырмандардың пошта жәшіктерінің не жоқ, не аңғал-саңғал жататынын бұған дейін де жазып келеміз. Алайда, өзгеріс байқала қоймайды…
Мына суреттер осы айтқанымыздың нақты дәлелі және бұл көп қабатты үйлерде көптеп кездеседі. Бұдан таратушы жеткізіп берген газеттің әрі қарайғы қауіпсіздігі жазылған оқырманның құзырындағы дүние екендігін көбіміз естен шығарып алатынымызды аңдауға болады. Тіпті кейбір үйлерде жәшіктің қарасы да көрінбейді. Амал жоқ, таратушы газетті не терезенің алдына, не болмаса ыңғайлы жерлерге қойып кетеді, ал ашық-шашық жатқан газетті кез-келген біреудің іліп кетпесіне кепіл жоқ қой. Содан кейін жеткізілген газетті «келмеді» деп қоңырау шалу үдей түседі. Сондықтан да пошта тасушылардың өз ісіне деген кәсібилігіне сын тақпастан бұрын, жәшіктерді ретке келтіріп, аузына құлып салып, реттеп отырған жөн болатынын тағы бір мәрте еске салғымыз келді.
Газет тасымалдауға байланысты тағы бір жайт – қаңғыбас иттердің кедергі болуы. Бұл жағдай Жезқазған, Сәтбаев қалаларындағы жеке тұрғын үйлерге жеткізуші пошташылардың мазасын қашырып келеді. Ит қауып алып, жазатайым жағдай орын алса, олардың өміріне кім жауап бермек? Құрметті оқырман! Біз көтеріп отырған екі мәселе де өзекті. Сондықтан мұндай жағдайлар газет тасымалына кері әсерін тигізбегені абзал.
Бағдат ҚАЗКЕНОВ.
