Биылғы жылды Мемлекет басшысы Қасым-Жомарт Тоқаев Қазақстан халқына Жолдауында «Жұмысшы мамандықтары жылы» деп жариялаған болатын. Бұл бастама аясында «Қазақмыс» корпорациясы» ЖШС Ардагерлер кеңесінің Сәтбаев филиалы жоспарлы түрде оқушы жастармен кездесулер өткізіп, жұмысшы мамандығын дәріптеу, жастарға кәсіптік бағдарлама беру жұмысын қолға алған еді.
Осындай алғашқы кездесулердің бірі Ардагерлер кеңесі Сәтбаев филиалының ұйымдастыруымен қаладағы Индустриялық колледж студенттерімен болып өтті. Кездесуді Ардагерлер кеңесінің белсенді мүшелері, «Қазақмыс» корпорациясының Еңбек ардагері С. Жанқұтов, еңбек ардагері Б. Шәйкенов және осы жолдардың авторы жүргізді. Жастарды еңбекке баулу тақырыбында кездесулер өткізіп жүрген ардагерлер сол үрдістен танған жоқ. Президент жолдауын талқылай келе ерен еңбегімен ел құрметіне бөленген, өңірімізден шыққан біраз азаматтардың еңбек жолдарын баяндап өтті. Өзі сүйіп таңдаған мамандығы бойынша ұзақ жыл еңбек етіп, зор жетістіктерге жеткен абзал азаматтарды тілге тиек етті.
«Жұмыстың жаманы жоқ, кез келген еңбек қадірлі» деп Президентіміз айтқандай, кәсіби мамандықты шебер игеріп, ел игілігі үшін тер төгу керек. Міне сонда еліңнің елеулісі, халқыңның қалаулысы боласыңдар», – деп тұжырымдады ақсақалдар. Болашақ дәнекерлеуші студенттерге Б. Шәйкенов ақсақал өзінің осы салада 40 жыл еңбек еткен еңбек жолынан сыр шертті. Дәнекерлеуші мамандығының қыры-сырымен таныстырып, техникалық қауіпсіздік cақтау ережелерінен де түсініктер берді.
Кездесу барысында студент жастар өздерінің дәнекерлеу шеберліктерін іс жүзінде көрсетіп, ақсақалдарға ақыл-кеңестері үшін алғыс айтты.
Ибадулла Байбатыров, «Қазақмыс» корпорациясы Ардагерлер кеңесінің мүшесі.
