Ақпараттық технология дамыған заманда жасөспірімдердің ойлау қабілетін дамыту, шығармашылығын шыңдау қазіргі білім ошақтарының негізгі бағытына айналды. Мектептерде спорт түрлерінен үйірмелердің жұмысы жолға қойылды.
Қызығушылығы басым жасөспірімдер әртүрлі үйірмелерде қарым-қабілеттерін шыңдайды. Өткен жылы Жезқазған қаласын дадарынды балаларға есігін айқара ашқан «Өркен» мамандандырылған мектеп-интернатында шахмат үйірмесі ашылып, онда білімге құштар оқушылар шахматтың қыр-сырын үйренуде.
Шахмат – логикалық ой өрісті машықтандыратын спорт түрі. Осы ойын түрі арқылы балалар ой жүйріктігіне, шапшаңдыққа баулынуда. Шахматқа қызығушылық танытқан жасөспірімдердің қабілетін шыңдау мақсатында 9-11 наурыз аралығында «Өркен» мамандандырылған мектеп-интернатында тартысты турнир ұйымдастырылды. 6-16 жас аралығындағы жасөспірімдер қатысқан бәсекеде үздіктер анықталды.
Жезқазған қаласындағы білім ошақтарынан 32 оқушы шахмат ойынын қаншалықты меңгергендіктерін байқатты. Ойынға аймағымызға танымал шахмат шебері Әділхан Қожабеков төрелік жасады. «Белдессең, бекем бол!» деген ұстанымды берік ұстанған балақайлар оңайлықпен бір-біріне дес бере қоймады.
Үздік шыққандарды марапаттау салтанатында сөз алған мектеп директоры Әлия Бәжібаева турнирдің жоғары деңгейде өтуіне атсалысқан, демеушілік көрсеткен Жезқазған кен байыту фабрикасының директоры Мұрат Бөрібаев пен өндіріс орнының еріктілеріне алғысын білдірді.
Аталмыш бәсекекелер жылы облыстық немесе республикалық деңгейде өтеді деп тұжырымдалуда. Шахмат ойынында үздік шыққан жасөспірімдер жүлделермен марапатталып, сый-сияпатқа ие болды.
Бағдат АЙТӨРЕҰЛЫ.
