Апат айтып келмейді. Әлде бір төтенше жағдай бола қалса, оған мектеп оқушылары да дайын болулары керек. Жезқазғанда дәстүрге айналған «Жас құтқарушылар» сайысы өтті. Жеткіншектердің дайындығы қалай?
Биылғы жарыс жезқазғандық 9 мектептің жас құтқарушыларының басын қосты. Шараның басты мақсаты – өскелең ұрпақтың бойында азаматтық міндетті арттыру, өрт, апат кезінде жедел әрекет ету шеберлігін қалыптастыру.
Жас құтқарушылардың алдымен суда адамның өміріне қаншалықты араша түсе алатындары тексеріледі. Сайыс шарты бойынша қатысушылар барлық ережелерді сақтап, уақытында тапсырмаларды дұрыс орындау керек. Ол білікті мамандардың қатаң қадағалуында. Балалар қауіпсіздік ережелерін мектептерінде, арнайы үйірмелерде меңгеріп келген. Бүгін соны іс жүзінде дәлелдеп, шеберліктерін көрсетуге дайын.
Алдымен командалар құтқару шеңберін, «александр түйінін» лақтырып қайықпен суғ абатқан адамды құтқару әрекетін жасады. Әрине, тапсырма оңай емес. Бірақ жас құтқарушылар ептіліктерін көрсете алды.
«Жас құтқарушылар» жарысының екінші һәм қорытынды айналымы Металлург стадионында өтті. Олар екінші айналымда «жауынгерлік қанат жаюдан», өртті өшіруден сынға түсті. Ең үздік командалар анықталып, марапатталды. Командалардан өзге үш аталым бойынша жекелеген жас құтқарушылар да марапат төрінен көрінді. Айта кетейік, дәстүрге айналған бұл жоба келер жылы да жалғасын таппақ.
Гүлім МАРАТҚЫЗЫ.
