«Қазақмыс Смэлтинг» ЖШС басшылығы қызметкерлердің әлеуметтік қорғалуын нығайту мақсатында жаңа «Ұжымдық келісім-шартқа» қол қойды.
Бес жылға арналған бұл құжатта жұмыс берушінің, кәсіподақтардың және еңбеккерлердің ұсыныстары жан-жақты ескерілді.
Келісім «КәсіпҚорған», «Еңбек», «Әділетті жол», «Қазақметалл кәсіподағы» ұйымдары мен «Қазақмыс Смэлтинг» ЖШС Бас директоры Жәнібек Байғабеловпен жасалды. Жаңа «Ұжымдық келісім-шарт» еңбек жағдайын жақсартуға, еңбеккерлердің әлеуметтік тұрғыда қорғалуын нығайтуға және ұжымдық әлеуметтік саясатты одан әрі дамытуға бағытталған.
Келісім-шарт аясында енгізілген маңызды жаңашылдықтардың бірі – еңбеккерлер мен олардың отбастарын қолдау шараларының ауқымының айтарлықтай кеңеюі. Атап айтқанда, бала туған кезде берілетін төлемдер бұрынғы мөлшерден 5 есеге ұлғайды. Мұндай қамқорлық отбасын құрған жас отау иелеріне де қарастырылған. Сонымен қатар, отбасында ерекше күтімді қажет ететін бала тәрбиелеп отырған отбасылардың да әлеуметтік тұрғыда қорғалуының жаңа тетіктері айқындалды.
Сондай-ақ оқыңыз
«Қазақмыс Смэлтинг» ЖШС Бас директоры Жәнібек Байғабелов бұл «Ұжымдық келісім-шарттың» компания өміріндегі маңыздылығын ерекше атап өтіп, еңбек ұжымдарымен тығыз қарым-қатынаста жұмыс жасаудың маңызды екенін тілге тиек етті. Сондай-ақ, Бас директор кәсіподақтардың металлургия саласындағы ауқымды шараларда компания басшылығымен бірлесе жұмыс атқаруға шақырды.
Жәнібек Алтынбекұлы кездесу барысында алдағы жылдарға арналған металлургия саласын дамытудағы стратегиялық жоспарларға тоқталды. Әсіресе, еңбек жағдайын, қауіпсіздікті нығайтуда жаңа келісім-шарт негізінде жүйелі жұмыстар атқаралады деді.
Бағдат ҚАЗКЕНОВ.
