«Қазақмыс» корпорациясы» ЖШС «Жезқазғантүстімет» ӨБ құрамындағы мамандандырылған жөндеу-механикалық басқармасындағы «КәсіпҚорған» кәсіподағы комитетінің төрағасы Серік Алтынбеков басқармаға қарасты № 1 жөндеу телімінде болып, ұжыммен кездесті.
Комитет төрағасы «Қазақмыс» корпорациясы мен кәсіподақтар арасындағы «Ұжымдық келісім-шартта» көрсетілген жаңа бағыттардың тиімділігін түсіндіріп берді.
– Корпорация мен кәсіподақ арасындағы бұл келісім-шарт жұмысшының әлеуметтік жағдайын жақсартуға басымдық беріп отыр. Сондықтан жұмысшылардың құқықтары мен мүдделерін қорғаудан бөлек, екі тарап әлеуметтік мәселелерге де баса мән береді. Бұл «Ұжымдық келісім-шартта» көзделген барлық шаралар еңбеккерлерге мол мүмкіндік береді, – деді Серік Алтынбеков.
Серік Советұлы кездесуде жұмысшылар тарапынан туындаған арнайы киіммен қамтылу, еңбек жағдайын жақсарту сынды сұрақтарға жауап берді. Жүздесуден соң комитет төрағасы әкімшілік-тұрмыстық кешендегі себезгі, киіну орындары мен телімнің арнайы жұмыс бөлімшесінде болып, еңбек жағдайын бақылады.
Сондай-ақ оқыңыз
Айта кеткен жөн болар, Жезқазған байыту фабрикалары аумағындағы жөндеумеханикалық жұмыстарына жауапты телімге Азамат Бейсбеков басшылық жасайды.
Бағдат ҚАЗКЕНОВ.
