«Қазақмыс» корпорациясы» ЖШС басшылығының қолдауымен құрылып, бүгінде қанатын кеңге жайған «Қазақмыс» корпорациясы» ЖШС еңбеккерлерінің «Jastar Bolashaq» Жастар одағының құрылғанына 5 жыл толды.
Луиза Мыңбаева басқаратын жастар ұйымының филиалдары бүгінде Жезқазған, Сәтбаев, Қарағанды, Балқаш, Семей өңірлерін қамтиды. Аталмыш одақтың бес жылдығына орай апта басында аймақта өндіріс жастарының слеті өтті. Еліміздің әр өңірінен келген жастарға әуелі «Қазақмыс» корпорациясы» ЖШС «Жезқазғантүстімет» ӨБ ғимаратында орын тепкен Қаныш Имантайұлы Сәтбаев атындағы тарихи-өндірістік мұражайға экскурсия ұйымдастырылды. Одан кейін «Қазақмыс» корпорациясы басшылығы мен Қазақстанның Құрметті металлургі, Қарағанды облысы мен Жезқазған қаласының Құрметті азаматы, «Қазақмыс» корпорациясы» ЖШС жанындағы Ардагерлер кеңесінің басқарма төрағасы Төлеген Бүкіров, Қазақстанның Еңбек Ері, даңқты кенші, бригадир Тұрсынбек Мақышев жастармен кездесіп, ашық диалог өрбітті. Өндірістегі өзекті тақырыптар қозғалды. Кездесудің басты кейіпкерлерінің өндіріске келу жолдарына қаныққан жастар бұл жиыннан да мол әсер алды.
Одан кейін жастарға арналған «Мобилография. Коперайтинг. SMM» заманауи ақпарат жүйелері бойынша курс ұйымдастырылды. Түс ауа «Өндірістегі жастардың көшбасшылық қабілетін дамыту» тақырыбында тренинг өтті. Онда «Еуразия-1» арнасының тележүргізушісі Асаубек Айымбетов дәріс оқыды.
Өндіріс жастарының слеті Жезқазған қаласындағы «Garden Hall» мейрамханасында қорытындыланып, үздіктер «Amanat» партиясы «Қазақмыс» корпорациясы» ЖШС жанындағы Ұлытау филиалының, «КәсіпҚорған» кәсіподағының марапаттарына, Қазақстанның Еңбек Ері Тұрсынбек Мақышев атындағы сыйақыға ие болды.
Бағдат ҚАЗКЕНОВ.