«КәсіпҚорған» кәсіподағы Жезқазған филиалы мен «Қазақмыс» корпорациясы» ЖШС еңбеккерлерінің «Jastar Bolashaq» Жастар одағы бірлесіп ұйымдастыратын жыл сайынғы дәстүрлі спартакиада шеңберінде спорттың бірнеше түрі қамтылған. «Қазақмыс» корпорациясының Ұлытау облысы төңірегіндегі өндірістік құрылымдардың еңбеккерлері белсенді қатысып кел жатқан спартакиаданың келесі бәсекесі волейболдан өтті.
Екі аптаға жуық бақ сынаған әуесқой ойыншылардың бағы мен бабы қатар шапты десек болады. Командалық ойынның алғашқы кезеңінен-ақ үздіктер дараланып тұрды. Бірнеше айналымда өткен жарыстың нәтижесінде жүзден жүйріктер анықталды. Сонымен биылғы жылдың спартакиадасында спорттың бірнеше түрінен жеңімпаз атанып келе жатқан Жезқазған байыту фабрикасының волейболшылары тағы да топ жарып, жеңіс тұғырына көтерілді. Екінші орынды Жезқазған мыс қорыту зауытының командасы алса, үшінші орынның жүлдесімен Ғазиз Омаров атындағы шахтапроходкалау тресі марапатталды.
Ойында көзге түскен жекелеген ойыншылар түрлі номинацияларға ие болды. Атап айтқанда, «Транко Жез» ЖШС-нен Ерболат Мейрашов «Үздік байланыстырушы» аталымына лайық деп танылса, шахтапроходкалау тресінен Ержан Әубәкір «Үздік бұғаттаушы» аталымын иеленді. Жезқазған мыс қорыту зауыты командасынан Иманбек Еденбаев «Үздік шабуылшы» деп танылса, Жезқазған байыту фабрикасынан Нұрбол Ғалым «Үздік ойыншы» номинациясын еншіледі.
Бағдат ҚАЗКЕНОВ.
Сондай-ақ оқыңыз
