Тау-кен, металлургия және аралас өндіріс еңбеккерлерінің «КәсіпҚорған» кәсіподағының Жезқазған филиалы 8 Наурыз – Халықаралық әйелдер күніне орай «Көшпенділер ойыны – 2025» деген атаумен нәзік жандар арасында спорттық жарыс ұйымдастырды.
Аталған жарысқа «Қазақмыс» корпорациясы» ЖШС Жезқазған өңірі бойынша кәсіпорындарында еңбек ететін қыз-келіншектер қатысты. 26 команда өзара спорттың бірінше түрінен бақ сынады. Жарыстың әрбір кезеңінде командаға топтасқан арулар бір-біріне есе жібермеуге тырысты.
Ойын шарттары оңайдан қиынға қарай ойысқан сайын жеңімпаз атануға ұмтылғандардың құлшынысы арта түсті. Ұлттық ойындардан дес бермеген командалар жеңіс тұғырына көтерілді.
Нәзік жандардың ептілігін, өмірде жеңіске деген құлшынысын арттыруды көздеген жарыста тау-кен жобалу институтының командасы І орынды жеңіп алды. «Tranco Jezz» ЖШС арулары ІІ орынды еншіледі. «КазКат» зауытының нәзік жандарына ІІІ орынның жүлдесі бұйырды.
Сондай-ақ оқыңыз
– Дәстүрге айналған бұл жарыс өндірістің кез келген буынында еңбек етіп жүрген қыз-келіншектеріміздің рухын көтеріп, олардың бәсекеге қабілетті екендігін паш етуді көздеген «Көшпенділер ойыны – 2025» спорттық шарасы мықтыларды анықтады. Біздің аруларымыздың алмайтын қамалы, бағындырмайтын белесі қалмайтынын осы ойын дәлелдеді десек болады, – деді жарыс жеңімпаздарын марапаттаған филиал төрағасы Ақылбек Төлепбергенов.
Бағдат ҚАЗКЕНОВ.
