Өмірлерін кен өндірісіне арнап, бүгінде бейнетінің зейнетін көрер шаққа жеткен сала ардагерлерін ұлықтап, құрмет көрсету «Қазақмыс» корпорациясы деңгейінде жұмыс беруші мен «КәсіпҚорған» кәсіподағы тарапынан жолға қойылған.
Өңіріміздегі алып кен орны саналатын Оңтүстік Жезқазған кенішіндегі «КәсіпҚорған» кәсіподағы комитетінің төрағасы Алмаз Қоңырқұлжинов зейнеткер атанған үш еңбек ардагерін кеніш директоры Мұрат Алдабергеновпен бірге құрметтеп, салаға қосқан үлестері үшін ықыластарын білдірді.
– Адал еңбек, маңдай термен атқарған істің нәтижесін көрер шақ – зейнет жасы десек, бүгін сіздер осы мерейлі қуанышқа ие болдыңыздар. Кен өндірудегі тәжірибелеріңіз бен біліктіліктеріңіз талай буынға өнеге болып қалды. Зейнет жасындағы қуанышты күндеріңіз көп болсын. Өздеріңіз еңбек сіңірген Оңтүстік Жезқазған кеніші ұжымының сіздерге деген ықыласы ерекше, – деді Мұрат Рахымбекұлы.
Ұзақ жылғы еңбегіне сай зейнеткерлікке жеткен № 65 шахтаның кен көтерме панелін басқару операторы Серік Борбасов, аталған шахтаның № 45 құрылыс телімінің ағаш шебері Сұлтан Кутинов, өрт қауіпсіздігі және еңбекті қорғау жөніндегі шебер Төлеубек Тұрманов кеніш басшылығы мен кәсіподақ ұйымының өздеріне көрсеткен ықыластарына алғыстарын білдірді. Үш бірдей сала ардагері кәсіподақ ұйымы атынан төсбелгі мен ақшалай марапатқа ие болды.
Сондай-ақ оқыңыз
Бағдат ҚАЗКЕНОВ.
