Қазақстан шахмат федерациясы мен Парламент Сенаты бірлесіп ұйымдастырған «Senat Open-2025» шахмат турнирі биыл екінші жыл қатарынан өткізілгелі отыр. Осыған орай қазір жер-жерде Сенат кубогы сарапқа салынатын жарысқа қатысуға үміткерлерді іріктеу ойындары өткізілуде. Ұлытау облысында шахмат ойыншыларының алғашқы іріктеу турнирі ардагерлер арасында ұйымдастырылды.
Облыстық денешынықтыру және спорт басқармасы мен Ардагерлер кеңесінің ұйымдастыруымен Жезқазғандағы «Жігер» спорт кешенінде өткізілген іріктеу жарысына аудан, қалалардан 50-ге жуық шахматшы ардагерлер қатысты. Іріктеу сайысын облыстық денешынықтыру және спорт басқармасының басшысы, Қазақстан шахмат федерациясының Ұлытау облысы бойынша атқарушы директоры Бағдат Байсалбеков ашып, қатысушыларға турнирдің ережесін түсіндірді. Жарыс ФИДЕ ережелері бойынша 9 кезеңнен тұратын швейцариялық жүйе бойынша өткізіледі. Жалпы «Senat Open-2025» ІІ ашық кубогының ойындары үш кезеңде өтеді. Іріктеу жеңімпаздары Семей қаласында болатын жартылай финалға, ал ең үздіктері елордалық финалға қатысады.
Сондай-ақ, жарысқа қатысушыларға сәттілік тілеп, сөз сөйлеген облыстық Ардагерлер кеңесінің төрағасы Сағындық Қожамсейітов шахматты аға ұрпақ арасында насихаттау арқылы олардың шеберліктерін арттыратын мұндай мәртебелі сайыстың маңызы зор екеніне тоқталды. Іріктеу жарысына қатысушылар арасында өткен жылғы Сенат кубогы турнирінде финалдық ойынға қатысып, 130 ойыншының арасында төртінші орынға іліккен, кезінде Оңтүстік Жезқазған кенішінде, «НИПИцветметте» еңбек еткен тау-кен инженері, Сәтбаев қаласының ардагері Әзірбек Молдағалиев сияқты шебер ойыншылардың болғанын да айта кетуге болады. Бүгінде 87 жасқа аяқ басып отырған ардагер шахматшы бұл жолғы іріктеу жарысында да ең жоғары ұпайға ие болып, көш бастады.
Ардагерлер сынағының қорытындысы бойынша Сенат ашық кубогының алдағы іріктеу кезеңіне қатысуға ең жоғары ұпай жинаған 20 ардагер үміткер болды. Байқауды ұйымдастырушылар 5-орын алғанға дейінгі жүлдегерлерге ынталандыру сыйлықтарын тапсырды. Негізінде «Senat Open-2025» турнирі ардагерлермен қатар мемлекеттік қызметкерлер, депутаттар, қоғамдық ұйым мен жұртшылық өкілдері арасында шахматты насихаттауға және жергілікті шахмат қауымдастығын дамытуға бағытталған шара екені белгілі. Осыған орай енді жоғарыда айтылған қызметкерлер мен жастар тобының қатысуымен алдағы 5 мамырда жалпы Ұлытау облысының шахматшылар командасын іріктеуге арналған жарыс өткізілетін болады. Үздік шыққан ойыншылар 15 мау-
сым мен 9 тамыз аралығындағы жартылай финалға, одан әрі 29 тамызда Астанада өтетін финалдық жарысқа қатысады.
Амандық РАХҰЛЫ.
