«Қазақмыс» корпорациясының өндірістік құрылымдарында еңбектегі жетістігімен ғана емес, өнер мен спортта да жеңіске жетіп жүрген дарындылар аз емес.
Әсіресе, жауапкершілігі зор саламен қатар спортты да серікетіпжүргендердіңжеткен жетістіктеріне қарап кеудені қуаныш кернейді. Кен өндіру саласында табысты еңбекпен көзге түсіп жүрген ДамирТәліпов биік шыңдарды бағындыруда.
«Жыланды» кенішінде жару, аттыру жұмыстарына қажетті жарылғыш заттарды тасымалдаушы болып еңбек ететін Дамир жақында Алматы қаласында өткен халықаралық жарыста топ жарды. Медеу шатқалындағы Аманкелді шыңына шыққан спортшы Астана, Мәскеу, Барнаул, Санк-Петербург, Барселона, Парижден келген сайып қырандардан оза шапты. «AmangeldyRace 2023» халықаралық жарысы осы шыңды бағындыруда опат болған спортшыларды еске алу мақсатында ұйымдастырылды. Байрақты бәсекеде Ұлытау облысынан, соның ішінде алпауыт «Қазақмыстың» намысын қорғаған Дамир Тәліпов 700-ден аса спортшымен бірген шыңды бағындырып, елге жеңіспен оралды.
– Бұл аталмыш марафон менің алғашқы белесім емес. Бұған дейін де еліміздің әр аймағында өткен жарыстарға қатысып, жеңістің туын желбіретіп келемін. Әрине, әр жарыстың өз қиындығы, белгілі бір межесі болады. Соған жету жолында қаншама дайындық керек. Өндірісте еңбек ете жүріп, спортпен шұғылдану – өте маңызды. Бір сөзбен айтқанда, спорт – менің өмірімнің бір бөлшегі. Салауатты өмір салтын ұстану арқылы денсаулығымды нығайта отырып, жұмысқа деген ынтамды да арттырамын. Өзімнің замандастарымды да спортпен шұғылдануға үндеп жүремін, – дейді Дамир.
«КәсіпҚорған» кәсіподағының мүшесі ретінде Дамир ұйымның қоғамдық шараларына да белсенді қатысып келеді. «Жыланды» кенішіндегі «КәсіпҚорған» кәсіподағы комитетінің төрағасы Сәкен Смағұлдың айтуынша, Дамир Тәліпов кәсіподақтың салауатты өмі рсалтын насихаттаудағы шараларында үнемі көзге түсуде.
– Дамир – біздің кеніштің мақтанышы. Ол еңбекқорлығымен қатар, спорттағы табыстарымен көптің көңілінен орын тауып үлгерді. Кәсіподақ қозғалысына да үнемі ерекше құлшыныспен атсалысады. Оның еңбектегі де, спорттағы да жетістігі өзінің алдына қоя білген мақсатына жетудегі қағидасынан деп бағамдаймын, – дейді комитет төрағасы.
Дамир Тәліпов небәрі 30 жаста. Отызында орда бұзып, қамал алған жас жігіттің спорттағы жетістігі әлі алда.
Бағдат ҚАЗКЕНОВ.
