«Батыс» кенішіндегі «КәсіпҚорған» кәсіподағы комитеті мен кеніш әкімшілігі асқаралы алпыстың асуына шыққан Қайрат Байсовты мерейтойымен құттықтап, құрмет көрсетті.
Кеніш директоры Алмаз Сәдуақасов, Қазақстанның Еңбек Ері, озат бригадир Тұрсынбек Макишев, «КәсіпҚорған» кәсіподағы комитетінің төрағасы Абзал Байсалбаев Қайрат Әбілбахытұлына лебіздерін арнады.
– Кен өндіру саласында еселі еңбегі бар азаматтың бірі деп білеміз. 25 жыл қатар үзеңгі қағысып келеміз. Алғашқы еңбек жолын Кен-шахта жабдықтары зауытында электр слесарь болып бастап, кейіннен Шығыс Жезқазған кенішіне қарасты №57 шахтада жалғастырды. Жерасты техникаларын жөндеудің хас шебері Қайрекең кеніш басшылығының құрметіне кенелген азамат. Өзім куә болған жайтты алға тартайын. Қайрекеңнің қарауынан өтпей техника жұмысқа кіріспейтін. Қазір де солай. Білікті слесарь өзінің шаруасына берік. Сондықтан батыстықтар Қайрат Әбілбахытұлын ерекше құрметтейді, – дейді Тұрсынбек Шамбылұлы.
Қайрат Байсов қазіргі таңда «Батыс» кенішіндегі сервистік телімнің озат электр слесарі. Ол өз кәсібіне шыңдалған білікті маман. Қайрекеңнің мектебінен өткен талай жас қазіргі таңда лауазымды қызметтер атқаруда. Абырой биігінен көрінген Қайрат Байсовтің еңбекқорлығы мен өз ісіне деген жауапкершілігі кейінгі жастарға үлгі.
Абыройлы азаматты ардақтау жиынында кеніштің геологі Гульфия Усмановаға да құрмет көрсетілді. Ажарлы алпысқа жеткен Гульфия Гумаровна – геология саласында жетістікке жеткен білікті маман.
Бағдат Қазкенов
