Биыл Ұлт ұясы Ұлытаудың жылнамасын жалықпай жазып келе жатқан аудандық «Ұлытау» газетінің жарыққа шыққанына 85 жыл толады. Газет сонау, 1940 жылы 1 қарашада «Большевик туы» деген атпен жарық көрген еді. Алғашқы редакторы Жұмабай Кетіков болды. Алғашында екі бет болып шыққан газет бүгінгі күні сегіз беттік, түрлі-түсті басылымға айналды. Осы 85 жылдан бері оқырмандарынан бір елі ажырамаған басылым қай кезде де билік пен халықтың арасындағы «алтын көпір» болып келеді.
Aймағымыздағы ақпарат саласының абызына айналған көнекөз басылымдардың бірі де бірегейі – «Ұлытау» газеті қазақ баспасөзінің қалыптасуына өзіндік үлесін қосумен қатар қаламын қару еткен журналистердің шығармашылығын шыңдар ұстаханаға айналды.
Тереңге тамыр тартқан тарихына көз жүгіртсек, түгін тартса майы шығатын табиғаты көркем, тарихы терең Ұлытау ауданы 1939 жылдың күзінде құрылып, арада жылға жуық уақыт өткен соң өзінің үнпарағы – «Большевик туы» газетінің алғашқы саны жарыққа шыққан. Кейін «Сталин туы», «Коммунизм туы» болып өзгертілген кездері болды, 1973 жылдан бері «Ұлытау өңірі» деген атпен шығып келді. Бүгінде «Ұлытау» деген асқақ атты ұстанып отыр. Сынаптай сырғыған уақыт көшінде газеттің оқырмандары асыға күтер үнпарағына айналуына сол жылдары қызмет еткен қаламы қарымды қазақ баспасөзінің қара нарлары өзіндік қолтаңбаларын қалдырды. Ұрпақтан-ұрпаққа жеткен жаңалық жаршысының жібін үзбей жалғасын тауып, жандана түсуіне Дихан Жұмабеков, Әбілқасен Әміралин, Көбейсін Еңсебаев, Төкен Оразбеков, Мағзұмбек Машайықұлы, Елтынды Дүйсенбаев сынды редакторлардың қосқан үлестері орасан зор.
Сан белестен өткен басылым тізгінін соңғы жылдары жас та болса бас бола білген Жалғасқан Құрмансейіт қолға алды. Қарағайдай қалың оқырман алдындағы жауапкершілігі жоғары міндетті абыройлы атқаруға кіріскен Жалғасқан Ахатұлы директорлық қызметке келгеннен бастап тарихы терең басылымның материалдық-техникалық базасының жақсаруына, жаңаруына, ең бастысы, журналистердің еңбекақысының өсуіне өзіндік үлес қосқандығы айрықша аталады. Оған аудан әкімдігінің тікелей қолдау білдіріп келе жатқандығына ұжым атынан ризашылығын білдіреді. Ал, шығармашылық ұжымды айрандай ұйытып отырған бас редактор – Әлмира Оспан көненің көзіне, жақсының сөзіне айналған газеттің ізгілікті ізін абыройлы жалғастырып келеді.
Ұлытау ауданының тыныс-тіршілігін, әлеуметтік-экономикалық дамуын тілге тиек етуде күретамырға айналған басылымның бүгінгі шыққан белесі биіктей түскен. Апта сайын ауданда атқарылған игі істердің, әлеуметтік-экономикалық, саяси, мәдени-спорттық іс-шаралардың басы-қасынан табылып, оны оқырмандарға жеткізуде жарғақ құлақтары жастыққа тимейтін қаламы қарымды, ұшқыр ойлы әріптестерім – Қайрат Жұмабай, Тәслима Оразалина, корректор Әлия Әбітова, офис-менеджер Айгүл Исабаева, бәріміздің ақылшымыз Мағзұмбек Машайықов ағамыздың есімдерін ерекше атау ләзім. Аптасына бір рет шығатын аудандық газет мазмұнының бай әрі алуан тақырыпты арқау етуіне қарымды журналистермен қатар, ойлы оқырмандар да атсалысып келеді.
Сондай-ақ оқыңыз
Орыстарда «Поэт в России больше чем поэт» деген сөз бар. Сол айтпақшы, аудан жұртшылығы үшін «Ұлытау» газетінің орны бөлек. Әуелде халықтың сауатын ашуға жәрдемдесіп, мәдениетке үндеген газет Ұлы Отан соғысы жылдарында әр кеудедегі үмітті оятып, Жеңісті жақындатты.
Біз кеңес өкіметін қанша жамандағанымызбен, сол дәуірде сайын далада қалалар мен кенттер, зауыт-фабрикалар, ірі мәдени нысандар бой көтергенін жоққа шығара алмаймыз. Біздің газет те сол ірі оқиғалардың «алғы шебінде» жүрді. Газеттің «тағдыры» да адамның тағдыры іспеттес. Оның да «жаза басып», адасқан тұстары баршылық. Бірақ ол жалғыз газеттің ғана емес, қоғамның да адасуы еді. Ал газетті қоғамнан бөліп қарай алмайсыз…
Тәуелсіздіктің таңы атқанда жұртшылықтан сүйінші сұрап, өзі де «Ұлытау» деп аталған басылым жас мемлекетіміздің іргесін бекітіп, шаңырағын тіктеуге қал-қадірінше атсалысып келеді. 85 жылдық тарихында газетте бірнеше толқын журналистер жұмыс істеді. Олардың көбі қазір арамызда жоқ. Марқұмдардың аруағының алдында басымызды иеміз.
Әр жылдарда осы газеттің ауыр жүгін арқалаған аға-апаларымыздың бар екеніне шүкіршілік етеміз. Құдайға шүкір, «Ұлытау» газеті – қазыналы қариялары бар «ауыл». Ал журналист аталатын ағайынның қолынан қаламы өлгенше түспейтінін бәрі де білсе керек. Ендеше, бүгін де зейнет демалысында жүрген «ұлытаулықтар» әлі біздің қатарымызда.
Ізтай Белгібайұлы.
