Әйел – ана, әйел – жар, әйел – еңбеккер. Бір қолымен бесікті, бір қолымен әлемді тербеткен әйел – бүкіл дүниенің ошағы, іргесі. Оның қоғамдағы орны де ерекше. Ер азаматтармен иық тұйістіріп, сан салалы қызметтер мен мамандықтарды игерген, еңбегімен ортасына үлгі болып жүрген нәзік жандылар қаншама. Мыңдаған кеншілер мен металлургтердің, байытушылардың басын біріктіретін «Қазақмыс» корпорациясының құрылымдарында да қаншама әйелдер, қыз-келіншектер жемісті еңбек етіп жүр. Бүгінгі мерейлі мереке қарсаңында біз солар жайлы әңгіме қозғағанды жөн көрдік.
Алтынай Ибрагимованың өмірдегі әуелгі мамандығы сауда саласы болатын. Зейнетке шыққан соң ол ойда жоқ жерден қолөнер кәсібіне қарай ойыса бастады. Бұдан бөлек, осыдан үш жылдай бұрын «Алтынай-Ана» қоғамдық бірлестігін құрды. Қайырымдылық жөніндегі республикалық шараларға қатысып, «Мейірім» номинациясы бойынша жүлдеге ие болды. Ол – сонымен қоса Қазақстандағы Чернобыль ардагерлер одағының мүшесі. Осының бәріне тағдырдың жазуына қатысты мәнәйі жағдайлар себеп болып, Алтынай бүгінде қоғамдық істерімен танылған Жезқазғандағы кәсіпкер аналардың біріне айналып отыр.
Алтынай Ибрагимқызы 1974 жылы Алматы сауда техникумын, одан кейін Мәскеудегі кеңес сауда институтын бітіріп, еңбек жолын қаладағы «Сарыарқа» дүкенінде товаровед болып бастаған еді. Өзінің тәлімгері болған сауда үйінің директоры Любовь Александровна Лазареваның есімін әлі күнге дейін құрметпен атайды. Мамандығын жан-жақты үйренген соң шаруашылық есеппен жұмыс істейтін сауда бөлімдерінде, үлкен гастрономда істеді, азық-түлік дүкенінің директоры болды. 1988 жылы екінші сәбиі өмірге келген соң сауда саласындағы жұмысын қоюға тура келді. Жолдасы Өтеген Төребеков Чернобыль апатын залалсыздандыруға қатысқан, соның салдарынан мүгедектік алған болатын. Оның күтімімен де айналысу қажет болды. Осыдан 12 жыл бұрын жолдасы өмірден өтіпті.
Алапат апат орнында болып, жұмыс істегендердің денсаулығына қаншалықты залал келгенін жан-тәнімен сезінген Алтынай 2022 жылы Түркістанда өткен Чернобыль одағының құрылтайына қатысып, ардагерлер одағының құрылу іс-шарасының ортасында болған-тын. Чернобыль ардагерлері одағының мүшелігіне қабылданып, содан бері оның жұмыстарына белсене атсалысуда. Қостанай облысында 2022 жылы өрт болғанда Алтынай Жезқазғандағы Чернобыль жесірлерінің атынан қаржылай көмек ұйымдастырып Аманқарағайға барды. 2023 жылы Талдықорғанда Чернобыль апаты құрбандарына ескерткіш орнатылғанда ашылу салтанатына қатысты. Өткен жылы да Алматыда өткен Чернобыль одағы мүшелерінің жиынының ортасында болды. Қызылорда қаласында құрылған «Аруана» қоғамдық бірлестігінің жұмысына да араласып, атсалысып отырады. Ал, негізгі әңгімемізге арқау болған қолөнері жайлы сұрағанымызда:
Сондай-ақ оқыңыз
– Немерем 2015 жылы балабақшаға барып жүрді. Бірде тәрбиешілері кардон қағаздан мүсін жасауға тапсырыс беріпті. Сол себеп болды. Содан бастап қалдық кардон қағаздарға екінші өмір берумен қызыға айналысып келемін. Мұны білген адамдар кейін тапсырыс бере бастады. Кардонмен қатар пенопласт, фетр, боса да клей материалдары қолданылады. Қызым Төребекова Каролина көмектесіп тұрады. Өткен жылы қаладағы «Бір ауыл – бір өнім» атауымен өткен қолөнершілердің көрме-жәрмеңкесіне қатыстым. Балабақша, мектептерден тапсырыс берушілер көп болды. Мәселен, «Ұлытау – ұлт ұясы», «Жаңа Жезқазған» деген макеттер мектепаралық конкурста бірінші орын алып, қалалық байқаудың жолдамасына ие болды, – дейді Алтынай кейінгі жасаған жаңа туындыларын көрсетіп.
Қолөнердің ерекше түрімен айналысатын Алтынайдың басқа жетістіктері де аз емес. Ол 2023 жылы Үкіметтік емес ұйымдардың «Қазақстанның Азаматтық Альянсы» форумында жүлделі екінші орынға ие болып, облыс әкімінің Алғыс хатын алды. Сондай-ақ, өткен жылдың сәуір айында Қайырымдылық республикалық конкурсына қатысып, «Мейірім» номинациясы жүлдесіне ие болуы да бекерден келген жай емес. Кәсіпкер өзінің «Алтынай-Ана» қоғамдық бірлестігінің жұмысы аясында жалғызілікті қарт аналарға, тұрмыс тауқыметіне ұшырағандарға, мүгедек жандарға дәрі-дәрмегін әперіп қайырымдылық көмегін жасап отырады. Әр жұма сайын нан алып, таратып береді. Мерекелерде стол жасап, шай ұйымдастырады. Кейінгі уақытта Алтынай Ұлытау облыстық ардагерлер кеңесінің қоғамдық ұйымдастырушысы ретінде де маңызды шараларға ұйтқы болып жүр. Өткен жылы «Атамекен» кәсіпкерлер палатасында үйде отыратын әйел аналардың қолөнерімен, басқа да пайдалы істермен айналысуын насихаттаған кездесу ұйымдастырып, ол ардагерлер кеңесінің «Ғибрат» телебағдарламасы арқылы көрсетілді. Қоғамдық іс-шаралар мен ізгілікті істерге осылайша оң иығын беріп тұратын Алтынай Ибрагимқызының алдағы уақытта да атқаруға ниеттеніп, ойға алған істері аз емес.
Амандық РАХҰЛЫ.
