Қаржы мәселесі – бүгінгі қоғамдағы өзекті тақырып. Осы орайда қаржылық сауаттылықты арттыруға бағытталған «Қарызсыз қоғам» жобасы жалғасын табуда. Бұл туралы Өңірлік коммуникация қызметінде өткен кезекті брифингте кеңінен айтылды.
«АMANAT» партиясының бастамасымен қолға алынған жоба мыңдаған адамға қарыздан арылудың тиімді жолын ұсынып, қаржылық тәуелсіздікке жетуді үйретуде. Мұндағы негізгі мақсат – азаматтарға қаржылық сауаттылық негіздерін көрсету.
–Жоба қаржылық сауаттылық деңгейін 30% – ға арттыруға, жыл сайын 500-ден астам білім беру іс-шараларын өткізуге және оны іске асыру барысында қатысушылардың тұтыну қарыздарын 20% – ға төмендетуді көздейді. Білім беру мен қолдау арқылы қарызға батпай, қаржы бейнетінсіз қоғам құру жобаның басты мақсаты, – дейді Ерлан Мырзабеков, «АMANAT» партиясы Ұлытау облыстық филиалының атқарушы хатшысы
Жоба басталғалы аймақта 2900 адам арнайы оқыту курсынан өтіп, сертификат алған. Биыл тағы 2700 адамды оқыту жоспарланып отыр. Сондай-ақ аталған жоба тек қаржы мәселесін шешумен ғана шектелмейді: интернет-алаяқтықтан арылу, борышкерлерге заңгерлік көмек көрсету, тіпті құмар ойындарына тәуелді адамдарға психологиялық қолдау көрсету шаралары да қарастырылған.
Сондай-ақ оқыңыз
– Несие алып, оны төлей алмай жүргендеріне 90 күннен асып кеткен азаматтар есепке алынды, – дейді «АMANAT» партиясы Ұлытау облыстық филиалының атқарушы хатшысы Ерлан Мырзабеков. – Заңгерлер бірінші кезекте клиенттің қарызының көлемі мен құрылымын анықтау үшін оның қаржылық жағдайына мұқият талдау жасайды. Осылайша барлық несиелік міндеттемелері бағаланып, оларды қайта құрылымдау мүмкіндіктері қарастырылады.
Статистикаға сүйенсек, еліміздегі әрбір жетінші адамның несиесін өтеу мерзімі 90 күннен асып кеткен. «Қарызсыз қоғам» аталған статистиканы төмендету үшін де оңтайлы жоба болмақ.
Гүлім МАРАТҚЫЗЫ.
