Жыл басында «Қазақмыс» компаниясы өз қызметкерлерін ұжымдық шарттағы балалардың тууына төленетін төлемдер мөлшерінің өзгеруі туралы жаңалықтармен қуантты. 2025 жылғы қаңтардан бастап компанияның құрылымдарында еңбек ететін жұмысшылар сәбилі болған кезде 30 АЕК сомасы аударылатын болады. Ол қазіргі уақытта 117 960 теңгені құрайды.
«КәсіпҚорған» кәсіподағының барлық мүшелері мыс алыбының қызметкерлері болмаса да, олар отбасындағы қуанышты оқиғаға байланысты жұмыс берушіден немесе кәсіподақтан төлемдер алады.
«КәсіпҚорған» кәсіподағы Жезқазған филиалының өкілдері ата-ана атанған қызметкерлердің өтініштері мен растайтын құжаттарын жинаумен айналысатындықтан, кейбір қызықты жайттарға куә болып жатады.
2024 жылы біздің кәсіподақ мүшелерінің 600-ден астам баласы өмір есігін ашты. Оның ішінде ата-анасы Жезқазған байыту фабрикаларында жұмыс істейтін жүзге жуық бала бар. Ал «Жезқазғансервис» кәсіпорны мен тау-кен, шахта жабдықтары зауытындағы «КәсіпҚорған» кәсіподақ мүшелерінде 46 қыз және 35 ұл өмірге келді. Аналар мен әкелер өз ханшайымдары үшін таңғажайып әдемі есімдерді таңдаған. Олар Таймия, Ясина, Зере, Кемеңгер, Арша, Ясмина есімдеріне ие болды.
Сондай-ақ оқыңыз
2024 жылдың желтоқсанында Жасұлан Серікұлы Ақибаевтың отбасында Руслан есімді 11-бала дүниеге келді. Жасұлан Ақибаевтың көпбалалы отбасында 10 ұл және 1 қыз бар. Жасұлан «Қазақмыс Мэйнтенанс Сервисиз» ЖШС «Жезқазғансервис» кәсіпорнының № 65 шахтасындағы № 1 сервистік телімінде жабдықтарға қызмет көрсету және жөндеу бойынша электрслесарь болып жұмыс істейді.
Сәбит Ыдырысовтың отбасында Дарын деген 9-баласы дүниеге келді. Сәбит Амандықұлының отбасында 5 қыз және 4 ұл бар. Отағасы «Қазақмыс Мэйнтенанс Сервисиз» ЖШС «Жезқазғансервис» кәсіпорнының № 73/75 шахтасының сервистік телімде жабдықтарға қызмет көрсету және жөндеу бойынша электрслесарь болып жұмыс істейді.
Құю-механикалық зауытының ұжымында бір жылда 10 ұл мен 8 қыз дүниеге келді. Бұл ұжымда ең танымал есімдер Айсұлтан мен Медина болды.
Бір қызығы, Жезқазған мыс қорыту зауытында кәсіподақтың 88 мүшесі ата-ана болды, ұлдар мен қыздардың саны бірдей көрсеткішке тең. Ол сәбилердің көпшілігі түрік телехикаяларының кейіпкерлерінің Ясмина, Сафина, Айсафи, Имран атты есімдерін иеленген.
Шығыс Жезқазған кеніші бойынша 2024 жылы 77 кенші сәбилі болды. Оның ішінде 5 қызметкер алғаш рет ата-ана атанды, 14 қызметкер сәби дүниеге келгеннен кейін көпбалалы отбасы мәртебесіне ие болды. Ата-анасын қуантып, өмірге келген Гордей Вадимовичтің әкесі № 57 шахтаның № 26 телімінің механигі Вадим Петровті ерекше атап өтуге болады. Вадим Юрьевичке «Жыл әкесі» атағын беруге әбден лайықты.
Қаныш Сәтбаев атындағы «Жезқазғантүстімет» ӨБ басқармасында 2024 жылы 46 бала дүниеге келді, оның ішінде 14-і қыз. Ата-аналардың ең сүйікті есімдері Томирис, Айлин, Сафия және Азалия болды. Ал ұлдар көбінесе Айбар, Мансур, Арлан, Арлен, Мұхамбет және Дінмұхамед деген есімге ие болған.
Медициналық орталықта 19 бақытты жұп ата-ана атанды, «Қорғау қызметінде» – 15, Жезқазған жылу орталығында – 14, Ал «Жомарт», «Батыс» кеніштерінде, «Tranco Expres» ЖШС-нде елуден аса жұмысшы сәби сүю бақытына кенелді.
Ал біздің «КәсіпҚорған» кәсіподағы Жезқазған филиалына 2024 жыл Дарина есімді ханшайым мен Альтаир атты батырды сыйға тартты. Альтаирді өмірге әкелген анасының да есімі өте сирек кездеседі. Айсалқын мен Бекзаттың тұңғыштары қылықтарымен тәнті етіп, өсіп келеді. Альтаирдің әкесі Бекзат «Жыланды» кенішінде еңбек етеді, спортшы.
Әрбір шаңыраққа шаттық сыйлап, қуанышқа кенелткен сәбилеріміздің дені сау болсын деп тілейміз.
Жанар Салықова, «КәсіпҚорған» кәсіподағы Жезқазған филиалының аппарат басшысы.
