Қазір түрлі технология дамып, заман алға қарай ілгерілеген тұста жеделсатының атына заты сай болуы керек деп ойлайсың.
Біздің Ұлытау облысы бойынша жалғыз көпбейінді ауруханада керекті қабатқа көтерілу үшін жеделсатыны сарылып күтіп тұруыңызға тура келеді. Қазір қарбалас өмірде уақыттың да адам үшін құны қымбат. Бұл аурухана тек науқастарды емдеп қана қоймайды, оның бөлімшелерінен жолдама бойынша тексерістен өтуге сырттан да адамдар келіп жатады.
Осындай қарбалас сәттерде жеделсатыны ұзақ күтуге тура келеді, әсіресе тоғыз қабатты ғимараттың жоғары қабаттарына баратын адамдардың жеделсатыны күтумен уақыт өткізіп, қынжылыс танытып тұрғанын жиі аңдайсыз. Өйткені, 4 жеделсатының кейде екеуі ғана қызметке жарамды болып тұрады және ықшамдалған жеделсатылар 3 адамнан артық салмақты көтере алмайды.
Бұл жеделсатының жыры аракідік айтылып қалып жүретінін естігенім бар еді. Жақында соған өзімнің де көзім жетті. Аурухана басшылығы бұл сынды облыс тұрғындарының сыны деп қабылдап, жеделсатының жылдамдығын тездетеді, яғни төрт жеделсатының жұмыс істеуін қамтамасыз етеді деп сенеміз.
Бағдат ҚАЗКЕНОВ.
