Тәуелсіз еліміздің еңсе тіктеп, бүгінгідей дәрежеге көтерілуінде өндірісте тер төгіп жүрген азаматтардың еңбегі өлшеусіз. Біздің өңірдің түсті металлургиядағы алыбы саналатын Жезқазған мыс қорыту зауыты өндірістік көрсеткішті арттыру жолында белгіленген жоспарды межелі мерзімде орындап келеді.
Кәсіпорындағы Нұрсұлтан Оспанов басшылық жасайтын мысты электролиздеу цехындағы матрицалық тақтайшалар дайындау бөлімі егемендігіміздің нышаны саналатын ұлық мереке – Республика күнін толайым табыспен қарсы алып отыр. Аға мастер Венера Құрмашеваның 5 звеносы катод мысын дайындап, өңдеуде үздіктер қатарынан көрінді.
Тәулігіне 6 серия катод мысын шығаратын бөлімшеде өз ісінің хас шеберлері еңбек етіп келеді. ІІ, ІІІ дәрежелі «Еңбек даңқы» төсбелгісінің иегері Венера Құрмашева, ІІІ дәрежелі «Еңбек даңқы» төсбелгісінің иегерлері Әлішер Жуанышев пен Бақтияр Фазылов сынды озаттар ұжымның мақтаныштары.
Тәулік бойына жұмысы үздіксіз жүзеге асатын бөлімшеде қазіргі күні 73 адам жұмыспен қамтылған.Олардың 80 пайызы жастар. Жалынды жастардың еңбектегі құлшынысы ағалар салған сара жолды жалғастырып жатыр. Өндірісті өркендету жолында табысқа жеткен бөлімше ұжымы мерекеде мерейлі шақтың куәгерлеріне айналып отыр.
Бағдат ҚАЗКЕНОВ.
