Жерінің асты қазба байлыққа толы Жезқазған өңірінің пайдалы қазбасын ел ырысына жарату жолында мыңдаған кенші жетіқат жер астында тер төгуде. Кенші болу батылдықты, еңбекке деген сүйіспеншілікті талап етеді. Осы қасиетБтер бойыңнан табылғанда бұл мамандықты толық игеріп кетуге болады.
ұл – кәсіби тұрғыдан шыңырауда шыңдалған кейіпкерімнің осы салада жүріп түйген ойы. Қуанышбек Ыбырақымның еңбек кітапшасында 2005 жылы «Батыс» кенішінің № 73 шахтасына бұрғылаушының көмекшісі болып жұмысқа қабылданды деген жазба ғана бар. Міне, содан бері 30 жыл уақыт өтіпті. Тапжылмай бір телімде, бір бригадада еңбек ету төзімділік пен мамандыққа деген ынтаның ерекше екендігін байқатады. Қуанышбек Байыршаұлы бұрынғы Қарақұм ауылы, қазіргі Қоскөл станциясының тумасы.
Ауыл баласы кез-келген шаруаның жігін жатқызып, ептілігімен көзге түсті. Бұрғылаушының көмекшісі бола жүріп, кен бұрғылаудың әдіс-тәсілдерін меңгерді. Ол білікті бригадир, еліміз егемендік алғанан бергі тұста кеншілер арасынан жалғыз Қазақстанның Еңбек Ері атанған Тұрсынбек Мақышевтің бригадасында жүріп, шыңдалды.
Қазір кен үңгілеудің шебері. Отыз жылда жинаған тәжірибесі Қуанышбек Байыршаұлын ұжымда белеске көтерді. Білікті үңгілеуші атанды.
– Уақыт легі жылжып, адымдай алға басып келеді. Шахта дейтін әлемге күне кеше ғана келгендей едік, зымырап 30 жыл өтіпті. Мен мұнда келгенде өз бауырларындай, тіпті, үлкендер балаларындай қарсы алған кез болды. Әсіресе, тәлімгерім Тұрсынбек Шамбылұлының көзқарасы ерекше болды. Ол кісінің тәжірибесі мен үшін үлкен мектеп болды. Кенді қауіпсіз үңгіп алу, техниканы дұрыс бағыттай білу сынды әдістерді жалықпай үйретті, – дейді Қуанышбек Байыршаұлы.
Отыз жыл бір салада еңбек көрігін қыздырып жүрген Қуанышбек Ыбырақымның кен өндірудегі жетістіктерін кеніш, корпорация басшылығы жоғары бағалады. Оны ІІІ дәрежелі «Кенші даңқы» төсбелгісіне лайық деп танып, марапаттады. Салаға қосқан еңбегі осылай бағаланды.
Бағдат ҚАЗКЕНОВ.
