Сары мыс сапырған Жезқазған мыс қорыту зауытында 28 сәуір – Дүниежүзілік еңбекті қорғау күніне арналған үздіктерді марапаттауға арналған салтанатты жиын өтті.
Өндіріс үшін адам өмірін сақтап қалу, еңбекте қауіпсіздікті барынша орындау сапалы өнімнің кепілі саналады. Бұл тұрғыда Жезқазған мыс қорыту зауыты еңбекті қорғау және қауіпсіздік техникаларын орындауда оң нәтижеге жетіп келеді. Жиында мыс қорыту заутының директоры Саят Әтен сөз алып, қауіпсіз еңбекті қалыптастыру жолында еңбегі ерен азаматтарға алғысын айтты. Саят Әбутахирұлы зауыт жұмысшыларының балалары арасында өткен сурет салу байқауында жеңімпаз атанған бір топ баланы марапаттады.
Зауыт басшысы құттықтау сөзінде:
– Зауыттың сапалы өнім шығару жолындағы басты қағидасы ол – қауіпсіздік. Біз осыны қаперімізден шығарған емеспіз. Отбасы, балашаға қамы үшін жалын жұтып жүрген азаматтардың әуелгі жетістігі ол – жұмысынан үйіне аман-есен оралу. Зауыт деңгейінде қауіпсіздік саясатын күшейту жалғаса береді. Өзімізге жүктелген міндетті орындап, қауіпсіз еңбек жағдайын қалыптастыру жолындағы еңбектеріңізге алғыс білдіремін, – деді.
Ұлытау облыстық мәслихатының депутаты, Жезқазған мыс қорыту зауытының аппарат жетекшісі, «Amanat» партиясының зауыттағы жетекшісі Силар Қияқбаев та еңбеккерлерді атаулы күнмен құттықтап, үздіктерге партия атынан сый-құрмет көрсетті.
Мұнан соң сахнаға көтерілген «КәсіпҚорған» кәсіподағы комитетінің төрағасы Ардақ Ақылбекова әуелі «Сақтық – өміріңнің кепілі» атты байқаудың жеңімпаздары – балқыту, мысты электролиздеу, жылу-энергиямен жабдықтау цехтарын марапаттады. Ардақ Мұқажанқызы еңбекті қорғау талаптарын орындауда көзге түскен бір топ техникалық инспектор мен жұмысшыға Алғыс хат табыс етті.
Бағдат ҚАЗКЕНОВ.
