«Қазақмыс» корпорациясы» ЖШС мен Ұлытау облысының әкімдігі арасында 2024 жылға арналған өзара түсіністік және ынтымақтастық туралы Меморандумға қол қойылды.
Меморандум аясында «Қазақмыс» корпорациясы» ЖШС биылғы жылы Ұлытау өңірінде білім, денсаулық сақтау, спорт, инфрақұрылымды дамыту және адами капитал салаларында жүзеге асырылатын 30 әлеуметтік жобаны қаржыландырады. Іске асырылып жатқан жобалардың жалпы құны 15,5 миллиард теңгеден асады.
2024 жылға арналған негізгі жобалар – Жезқазған қаласында 320 орындық дене шынықтыру-сауықтыру кешенінің құрылысын жүргізу, Кеңгір су қоймасының жағалауын салу, мешіт құрылысы, Жезқазған қаласында 280 орындық балабақша салу, Сәтбаев қаласындағы «Ақбота» балабақшасын күрделі жөндеуден өткізу, Сәтбаев қаласындағы «Кеншілер» даңқы аллеясын және Жезқазған қаласындағы Металлургтер алаңын қайта жаңғырту.
2023 жылы компания 30 жобаны жүзеге асыруға 11 млрд теңге бөлген болатын. Оның ішінде 14 жоба сәтті аяқталды. Солардың ішінде: мүгедек балаларға арналған күндізгі күтім орталығы ғимаратын алу және оны жөндеу, Сәтбаев қаласындағы С. Сейфуллин атындағы орта мектепті жөндеуден өткізу, «Ескұла жер асты су алу құрылымдарын жаңғырту» жобалық-сметалық құжаттамасын әзірлеу, «Ұлытау» футбол клубын ашу. Қалған 16 ірі жобаны жүзеге асыру биыл да жалғасын табады.
Бір сөзбен айтқанда, «Қазақмыс» Ұлытау өңірін дамытуды әрі қарай жалғастырады.
«Қазақмыс» корпорациясы» ЖШС баспасөз қызметі.
