Жыл айрығында өндірістің өркендеуіне үлес қосқан «Қазақмыс» корпорациясының озат еңбеккерлері түрлі дәрежедегі марапаттарға ие болуда. Мұндай марапаттың легі Жезқазған өндірістік аймағына да келіп жетті.
2023 жылдың өндірістік көрсеткіштерін межелі деңгейге жеткізіп, еңбек өнімділігін арттырған «Қазақмыс» корпорациясы» ЖШС «Жезқазғантүстімет» ӨБ еңбеккерлерінің омырауына төсбелгілер тағылды. Осындай салтанатты шара өндірістік бірлестіктегі «КәсіпҚорған» кәсіподағы комитетінің төрағасы Гүлнәзия Тәжібаеваның ұйытқы болуымен өтті. Жыл қорытындысы бойынша үш бірдей өндіріс озатына үшінші дәрежелі «Еңбек даңқы» төсбелгісі тапсырылды. Жиынға «Қазақмыс» корпорациясы» ЖШС «Жезқазғантүстімет» ӨБ бас инженері Жасұлан Байниязов қатысып, оларды марапаттады.
Еңбектегі жеке үлестері үшін «Қазақмыс» корпорациясы» ЖШС Тау-кен, байыту кешені «Жезқазғантүстімет» ӨБ көлік бөлімінің бас маманы Мұратбек Жұмағұлов пен өндірістік қауіпсіздік және еңбекті қорғау бөлімінің бас маманы Данияр Хамзин, энергетик күніне орай энергетика басқармасы жылумен, сумен жабдықтау бөлімінің бас маманы Андрей Мацкевич үшінші дәрежелі «Еңбек даңқы» төсбелгісін омырауларына жарқырата тақты.
Өндірістік бірлестіктің бас инженері Жасұлан Байниязов пен «КәсіпҚорған» кәсіподағы комитетінің төрағасы Гүлнәзия Тәжібаева марапатқа ие болған еңбек озаттарына алғыстарын білдіріп, алдағы жұмыстарына сәттілік тіледі.
Марапатқа ие болғандардың бірі Мұратбек Жұмағұловты әңгімеге тартқан болатынбыз.
– «Қазақмыс» корпорациясының көлік бөлімінде еңбек еткеніме биыл 17 жыл толыпты. Осы жылдар ішіндегі еңбегімнің бағаланғанына қуаныштымын. Бұл марапат менің ғана емес, тұтас бөлім қызметкерлерінің еңбегіне баға деп білемін. Диас Тастеміров басшылық жасайтын бөлім Жезқазған, Қарағанды, Балқаш қалалары бойынша жеңіл көлік пен теміржол қатынастарын, жүк, кенді тасымалдауды реттейтін ірі кешен болып табылады. Мұнда он үш адам еңбек етуде.
Бөлім бірнеше мәрте басқарма, департамент болып құрылымы өзгергенімен, басты ұстанымынан айныған жоқ. Еңбегімді бағалаған «Қазақмыс» корпорациясы» ЖШС «Жезқзғантүстімет» ӨБ басшылығына, бөлім басшысы мен «КәсіпҚорған» кәсіподағы комитетіне алғысымды білдіремін. Жаңа жылда өндірістің табысты болуына үлесімізді қоса береміз, – деп сөзін түйіндеді Мұратбек Ғаппасұлы.
Жылды жағымды да сүйінші жаңалықпен, марапатпен қорытындылаған өндіріс озаттарының Ұлу жылында да абыройлары асқақтай берсін демекпіз.
Бағдат ҚАЗКЕНОВ.
