Қанаттас жатқан қос қала Жезқазған мен Сәтбаевтің ортасында орналасқан Кеңгір кентінде осыдан 2 ай бұрын жаңа мешіттін құрылысы басталған болатын. Аузында Құдайы, жүрегінде иманы бар азаматтар – Алланың жердегі үйін қар түскенше толықтай аяқтауды мұрат етуде…
Үш жарым мыңға жуық тұрғыны бар кентке сыйымдылығы мол жаңа мешіттің қажеттілігі біраздан айтылып та, жазылып та жүр еді. Сауапты да жауапты істі жергілікті жамағат биылғы көктемде бірлесе қолға алды. Қомақты қаржы қажет деп билікке де, басқаға да қарап отырмай, өздері қор ашып, іргетасын қалаудан бастап түрлі ірілі- ұсақты жұмыстардың барлығын өз мойындарына алды. Дәстүрге сай жұмыстың әр кезеңінде дастархан басына жиналып, әрі қарай атқарылар шаруаларды ақылдасады. Имамдар игілікті істің берекесі жайында уағыздарын айтып, жомарт жандарды әрі қарай қанаттандырады…
– Міне, бастаған мешітті пайдалануға беретін күн де алыс емес. Құрылыс жұмыстарының аяқталуына шамалы қалды. «Жұмыла көтерген жүк жеңіл» дейді қазақта. Игі істе барлығымыз бір кісідей атсалықсайық, – деді өз сөзінде облыстың бас имамы Елдос Жұмаділдә.
Айта кетейік, салынып жатқан имандылық үйінде бір мезетте 200-250 адам құлшылық ете алады.
Гүлім МАРАТҚЫЗЫ.
