Ел тарихындағы ең ауқымды әрі бірегей «Super bol» спорттық реалити-шоуы Ұлытау облысында кастинг өткізді. Іріктеуге 16 – 25 жас аралығындағы 150 ден аса үміткер қатысты. Ұлытау облысы – әлеуметтік жоба аяладаған төртінші өңір.
Ұйымдастырушылардың сөзінше, жобаның басты ерекшелігі – форматы мен жаңашылдығы. Мұндай шоу елімізде бұрын-соңды болмаған. «Super bol» ең алдымен жастарға қолдау көрсетуге бағытталған.
– Бұл жоба футбол сүйер қауымға, жас балаларға үлкен үміт сыйлайды. Арманын орындауға керемет мүмкіндік береді. Өткен жылғы маусымда біздің реалити-шоу көп адамға пайдасын тигізді. Жарқын болашағына жол ашты десем, артық айтқаным емес, – дейді «Super Bol» спорттық реалити-шоуының негізін қалаушы Алан Прудников.
«Super Bol!» реалити-шоуының екінші маусымы 4 мамырда басталды. Жобаға қатысушылар Қазақстанның 14 қаласында өтетін кастинг арқылы іріктеледі. Таланттарды таңдауға арналған шоудың іріктеуіне жиналғандар аз болмады. Бауыржан Кудыратов ойнайтын команда да бүгін іріктеуге келген. Айтуынша, кастингке тыңғылықты дайындалып, осы күнді тағатсыздана күткен.
Іріктеуден өткен 8 спортшы «Қайрат» озық футбол базасында жаттығып, тәжірибелі бапкерлердің тәрбиесін алады. Кейіннен келісімшартқа отыруға да мүмкіндік алады.
Гүлім МАРАТҚЫЗЫ.
