«Асты кен, үстінде мал бұл даламның,
Жездімді жырға қосып, ән саламын»,– демекші, қойнауы кенге толған Жезді кентінде біраз уақыттан бері тоқтап тұрған байыту фабрикасы соңғы жылдары «НЭРИС» ЖШС атауымен жұмыс жасап жатқанын тұрғындарымыз өте жақсы біледі.
Қазіргі таңда фабрикада жүзге тарта тұрғын жұмыспен қамтылып, отбастарын асырап отыр. Осы кәсіпорынның жалпы Жезді кентіне жасап жатқан жақсылықтары мен игі істерін кент тұрғындарының бірі білсе, бірі біле бермеуі мүмкін.
Атап айтсақ, 2022 жылдың қыркүйек айында дүркіретіп өткізген Жезді кенішінің 80 жылдық мерейтойында іс-шараларды бұл ұжым арнаулы техникалық құралдарымен, газбен дәнекерлеу көмегімен, көлік қатынасымен қамтамасыз еткенін айтпай кету мүмкін емес .
Одан басқа, Тәуелсіздік және жаңа жыл мерекелік күндері аз қамтылғанжәнекөп балалы отбастарына азық-түлік таратып, тұрғындардың ризашылығына бөленсе, ұжымындағы жұмыскерлерінің балаларына Жезқазған қаласынан әртістер шақырып жаңа жылдық балалар ертеңгілігін Мәдени-сауықтыру орталығында ұйымдастырып, балалар мен ата-аналардың көңілінен шыға білді.
Өздерінің дәстүрлері бойынша кентіміздегі мектеп-интернаттың аз қамтамасыз етілген отбастарының балаларына жаңа жылдық сыйлықтар табыстап, көңілдерін аулап, ризашылықтарына бөленді.
Жезді кенті тұрғындарының өтініші бойынша кентіміздегі орталық моншаның ішкі есіктерін, жылу батареяларын және буллы моншасының пешін ауыстырып, жөндеп берсе, музей паркіндегі құлаған ағаштарды өз техникаларымен жинап, шығарып, оларды отын ретінде аз қамтылған отбастары мен зейнеткерлердің үйлеріне жеткізіп берді.
Кенттегі үнемі жергілікті малдар түсіп өлетін ескі шұңқырларды ауыл тұрғындарының тағы бірөтініші бойынша топырақпен толтырып, жауып берді.
«НЭРИС» ЖШС осындай игі істеріне куә болып жатырмыз. Өздеріңізге белгілі, биыл жылдың басы қалың жауған қармен басталды. Бұл орайда «НЭРИС» ЖШС Мәдени-сауықтыру орталығының айналасын және осы мекеменің жұмыскері, аз қамтамасыз етілген кент тұрғыны Бекишовтар отбасының ауласын арнаулы техникаларымен қардан тазалап, бізге де көмек қолын созды.
«Жақсының жақсылығын айт, нұры тасысын» демейме, «НЭРИС» ЖШС ұжымының басшылары Қайрат Сапанұлы Қабасов мен Ербол Сапарұлы Есетовке Мәдени-сауықтыру орталығының атынан үлкен алғысымызды білдіре отырып, осындай игі істеріңізбен жұртшылықты қуантып, халықтың ризашылығына бөлене беріңіздер дегіміз келеді!
Жезді кенті Мәдени-сауықтыру орталығының ұжымы.
