Табиғатты аялау, қоршаған ортаға жанашырлық көзқарас таныту адамзаттың басты борыштарының бірі саналады.
Соңғы жылдары ғаламдық экологияның шектен тыс бұзылуына байланысты ағаш егу жұмыстары қолға алынып, сол арқылы қоршаған ортаның ауасын тазарту шаралары жүргізіліп жатқаны белгілі. Экологияға пайдалы мұндай жұмыстар біздің өңірде де қарқынды қолға алынып отыр. Мыс алыбы саналатын «Қазақмыс» компаниясы жыл сайын Жезқазған, Сәтбаев қалаларына көшеттер отырғызу науқанына белсенді түрде атсалысады. Өндірістік аймақтың экологиялық ахуалын жақсартуға септігін тигізетін көгалдандыру бағдарламасы шеңберінде өткен аптада Тау-кен металлургия және аралас өндіріс еңбеккерлерінің «КәсіпҚорған» кәсіподағы тал отырғызу шарасына біркісідей қолдау білдірді.
Жезқазған қаласындағы Жастар саябағына көшеттер отырғызуға кәсіподақ төрағасы Ерболат Сатыбалдин бастаған орталық аппарат қызметкерлері, кәсіподақтың Жезқазған филиалы саябақты көгалдандыру арқылы шаҺар экологиясының жақсаруына ықпал қадам жасады. Алдағы уақытта егілген жасыл желектер кәсіподақ тарапынан күтіп, бапталатын болады.
Бағдат АЙТӨРЕҰЛЫ.
