Балқаш мыс балқыту заводында еңбек жағдайын жақсарту, жұмысшымен арадағы байланысты нығайту, жұмыс орнында туындаған мәселелерді шешуге бағытталған шаралар дер кезінде жүзеге асып отырады.
«Қазақмыс Смэлтинг» ЖШС басшылығының бағыт-бағдарымен қолға алынған «Естуші Смэлтинг» жобасы аясында завод еңбеккерлерімен ашық диалог алаңы берік қалыптасты. Осы бастаманың аясында завод директоры Айдар Түсіпбеков жақында өндіріс нысанының қосалқы цехтарында болып, жұмысшылармен жүздесті.
Айдар Өмірбайұлы кездесу барысында цехтардағы жағдайға талдау жасады. Еңбеккерлерді еңбек жағдайына байланысты толғандыратын сұрақтарына жауап берді. – Біздің негізгі цехтарда «Қазақмыс Смэлтинг» ЖШС бекіткен жоспар үнемі жүзеге асып келеді. Бұл әрине еңбек жағдайына тікелей байланысты. Қосалқы цехтардың да еңбек өнімділігін арттыру біздің басты мақсатымыз. Сондықтан біз осыған күш саламыз. Бұған дейін шихта дайындау, мысты электролиздеу цехтарында болдық. Алда металлургиялық цех бар, – деді завод директоры Айдар Түсіпбеков.
Бүгінгі күні Балқаш мыс балқыту заводы сары мыс өндіруші «Қазақмыс» корпорациясының түсті металлургиядағы алып кәсіпорны. Балқаш қаласының «жүрегі» іспетті нысан өндірістік көрсеткішті бәсеңдетпей келеді. Бұған «Қазақмыс Смэлтинг» ЖШС және завод басшылығының қолдауы себеп.
