8 Наурыз – Халықаралық әйелдер күнінде Қазақстан Республикасының Президенті Қасым-Жомарт Тоқаев ел дамуында айрықша үлесі бар нәзік жандарды құттықтап, түрлі дәрежедегі марапаттар тапсырды.
Мемлекет басшысы өз құттықтауында қазақстандық әйел қауымының Тәуелсіз Қазақстанды дамытудағы еңбегі ерен екенін айта келіп, нәзік жандарды қолдау мемлекеттің басты саясатының бірі болып қала беретіндігін айтты.
Ақордадағы алқалы жиында 60-қа жуық қыз-келіншек марапатқа ие болды. Солардың қатарында «Қазақмыс» корпорациясы» ЖШС «Жезқазғантүстімет» ӨБ қарасты мамандандырылған жөндеу-механикалық басқармасының электрмен дәнекерлеушісі Баянгүл Қамбарова мен №1,2,3 Жезқазған байыту фабрикаларының флотаторы Майра Ерманова да бар.
Баянгүл Қожабергенқызы өндіріс саласындағы айрықша үлесі үшін ІІІ дәрежелі «Еңбек даңқы» орденімен марапатталса, Майра Жұратбекқызы Президенттің Жарлығымен тұңғыш рет тағайындалған «Қазақстанның еңбек сіңірген өнеркәсіп қайраткері» төсбелгісінің алғашқы иегері атанды.
Сондай-ақ оқыңыз
Баянгүл Қамбарованың жалпы еңбек өтілі 35 жылды құрайды. Оның 22 жылы мамандандырылған жөндеу-механикалық басқармасының № 6 балқытуға дайындау телімінде жалғасты. Түсті металлургияның қарашаңырағы Қарсақбайдан қанаттанған Баянгүл Қожабергенқызы өзінің еңбегін жоғарғы марапатқа лайық деп тапқан «Қазақмыс» корпорациясы мен «Жезқазғантүстімет» ӨБ басшылығына, басқарма мен телім басшылары мен ұжымына алғысын білдірді.
– Президенттің қолынан марапат алу мен үшін зор құрмет. Осы салаға сіңірген еңбегімнің бағалануына бастамашы болған басшылыққа, ұжымға алғысым шексіз. Мемлекет басшысы Қасым-Жомарт Тоқаев өзі жариялағандай, биыл – «Жұмысшы мамандықтар жылы». Осы жылда қарапайым еңбек адамының мәртебесін көтеріп, абыройын асқақтату лайықты деп санаймын. Ақордада әр салада өнегелі істері қалған ардагер апаларымызбен қатар тұрып, марапатқа кенелу абырой десем, артық айтқандық емес, – деді орден иегері.
Баянгүл Қамбарова – әйелдер қауымы үшін дәнекерлеуші кәсібі ауыр болады деген қасаң қағиданы жоққа шығарған жан. Оның телімде қиын дәнекерленетін бөліктерді біріктіріп, одан үдеріске шыдамды дүние жасап шығарудағы қабілеті ер адамдардан артық болмаса, кем түспейді.
Ақырын жүріп, анық басқан Баянгүл Қожабергенқызы адал еңбегінің арқасында омырауына ІІІ дәрежелі «Еңбек даңқы» орденін тақты. Бұл өндіріс озатының мәртебесін асқақтатты.
Еліміз бойынша «Қазақстанның еңбек сіңірген өнеркәсіп қайраткері» төсбелгісін тұңғыш рет омырауына таққан Майра Ерманованың № 1, 2, 3 Жезқазған байыту фабрикаларындағы еңбек жолы біздің төңіректің жұртшылығына жақсы таныс.
Отыз бес жылын кен байыту ісіне арнаған Майра Жұратбекқызы – адал еңбегімен ұжымның құрметіне кенелген өндіріс озаты. Жауапкершілік пен намысты алдыңғы қатарға қойған ол өз саласында жемісті еңбегімен көзге түсті. Байыпты байытушының мамандыққа адалдығы оны әрқашан жетістікке жетелеп келеді. Соның айқын көрінісі алғаш болып «Қазақстанның еңбек сіңірген өнеркәсіп қайраткері» төсбелгісін иеленуі.
– Алғаш тағайындалған мұндай төсбелгіге ие болатынымды естігенде көкіректі қуаныш кернеп, көзге жас келді. Себебі ұзақ жылғы еңбегімнің айрықша бағалануы көңілді толқытпай қоймады. Адал еңбектің абыройға жетелегені мен үшін қуаныш, – деді Майра Жұратбекқызы.
Майра Ерманова бүгінде өз саласы бойынша жастарды өндіріске баулуда. Тәлімгерлік жолында талай жасты қанаттандырды. Жезқазғанның сары мыстың отаны деген атаққа лайықты болу жолында еңбектері өлшеусіз өндірістегі нәзік жандардың алдағы уақытта да абыройы асқақтай берсін деп тіледік.
Бағдат ҚАЗКЕНОВ.
