Сары мыс сапырған Жезқазған өңірінің өндірісіне қан жүгірткен Жезқазған кен байыту фабрикасында алғаш кен байытылғанына 70 жыл толып отыр. Кеңес дәуірінде бой көтеріп, Тәуелсіз Қазақстанның кен байыту шаруашылығында өзіндік орны бар өндіріс ошағы заман талабына сай жаңа технологиялармен қамтылып, үдерістер де жетілдірілді. Мысты шаһармен қатар еңсе тіктеген фабриканың мерейтойы Жезқазған қаласында сән-салтанатымен атап өтілді.
Торқалы тойда фабриканың дамуына қосқан үлесі үшін «Қазақмыс» корпорациясы» ЖШС басшылығы атынан «Қазақмыс» корпорациясы» ЖШС Бас директоры Олег Копытов 7 бірдей көліктің кілтін тапсырды. «Garden Hall» мейрамханасында өткен мерекелік шарада жеті құрметті ардагер KIA Seltos жаңа автокөлігін тізгіндеді. Солардың қатарында № 1 ұнтақтау корпусының слесарь-жөндеушісі Евгений Артамонов, № 2 ұнтақтау корпусының слесарь-жөндеушісі Жұмабек Түсіпбаев, № 1бас корпустың телім шебері Ерғалы Қанатов, № 2 бас корпустың диірмен машинисі Уәлихан Қалқанбаев, сүзу-кептіру бөлімінің шаң-газ тұту қондырғысының операторы Достияр Аңсағаев, мамандандырылған жөндеу-механикалық басқармасының газбен кесушісі Бақытжан Ескеев, құю-механикалық зауытының слесарь-жөндеушісі Ерлан Өтетілеуов бар. Өңірде кен байыту кешенін қалыптастырудағы аға буынның еңбегіне «Қазақмыс» корпорациясы осылайша құрмет білдірді.
Бағдат ҚАЗКЕНОВ.
