Соңғы бірер жылда Жезқазған қаласында қоныс тойын тойлайтындар легі артып келеді. Бұл шаһарда тұрғын үй құрылысының жанданып келе жатқанын көрсетеді. Нәтижесінде, ұзақ жылдардан бері баспана кезегінде тұрған тұрғындар саны азаюда.
Баспаналы болғандар қатары биылғы жылы тіптен арта түсті. Жезқазған қаласының 70 жылдығы қарсаңында шаһардың тағы 60 тұрғынына жаңа пәтердің кілттері салтанатты түрде табыс етілді. Жалпы, облыс бойынша жыл басынан бері 135 отбасы өз баспаналарына қол жеткізіп үлгерді. Кілт табыстау рәсіміне қатысқан өңір басшысы Берік Әбдіғалиұлы игі шараның әлі де жалғасын табатынын жеткізді.
– Осы жылы облысымыздың барлық өңірін қоса есептегенде 36 мың шаршы метрге жуық тұрғын үйдің құрылысы жүруде. Ол дегеніміз, 400-ге жуық баспана. Қазір бір Жезқазғанның өзінде 2000-ға жуық азамат үй кезегінде тұр. Мәселені осылай кезең-кезеңімен шешіп жатырмыз, –деді облыс әкімі өз сөзінде.
Орайы келгенде айта кетейік, берілген пәтерлер Жезқазған қаласының батыс ауданында орналасқан. Қазіргі таңда аталған аумақтағы жылу мәселесін шешу үшін желілер тартылуда. Жыл соңына дейін Жезқазғанда жалпы 270 пәтердің құрылысын аяқтап, қолданысқа беру көзделіп отыр.
Ізтай БЕЛГІБАЙҰЛЫ.
