Облыс аумағын абаттандыру үшін биыл 10 жоба іске қосылады. Оған мемлекет қазынасынан – 6 млрд. теңге, «Қазақмыс» корпорациясы тарапынан қосымша 5 млрд. теңгеден астам қаражат көзделіп отыр. Бұл жайында Ұлытау облысының әкімі Берік Әбдіғалиұлының төрағалығымен өткен аппараттық жиында айтылды.
Энергетика және тұрғын үй-коммуналдық шаруашылық басқармасының басшысы Алмаз Жандарбековтің баяндауынша, биыл бюджет қаражаты есебінен – 5, «Қазақмыс» корпорациясымен Меморандум аясында тағы 5 жобаны іске асыру жоспарланған. Соның ішінде корпорацияның күшімен Сәтбаев қаласындағы Кеншілер даңқы алаңына қайта құру жұмыстары жүргізіледі. Жобаның бірінші кезеңін биыл қазанда аяқтау көзделген. Сондай-ақ, Ұлытау селосында Тасбұлақ бұлақ аумағын да «Қазақмыс» корпорациясы» ЖШС меморандумы аясында абаттандырады. Осындай бір ілкімді іс өткен жылы басталған Жезқазғандағы «Металлургтер алаңын» жаңғырту болатын. Бұл жұмыстар биыл мамырдың соңында аяқталады.
Мұның сыртында 2 саябақ пен 3 скверді, Кеңгір су қоймасының жағалауын абаттандыру жұмыстары да меморандум негізінде жүргізіледі. Кеңгірді жаңғырту жобасы 2024 – 2026 жылдарды қамтиды.
Орайы келгенде айта кетейік, аймақты абаттандырылатын 10 жобаның ішінде 73 көппәтерлі тұрғын үйдің қасбетін күрделі жөндеу, 32 тұрғын үйдің шатырын күрделі жөндеуден өткізу, 71 балалар ойын алаңын, 31 спорт алаңын, 26 жаттығу кешенін орнату көзделген.
Сондай-ақ оқыңыз
Сондай-ақ Жезқазғанда мердігер ұйым жосықсыздығы салдарынан былтыр жүзеге асырылмаған 19 ойын алаңын орнату жұмыстары аяқталмақ.
Ізтай БЕЛГІБАЙҰЛЫ.
