Сәтбаев қаласының шығыс бөлігінде, тұрғындар арасында «Қазақы ауыл» атанып кеткен маңда «МЖК» аталып кеткен шағын аудан бар. Сол ауданда үш қабатты бірнеше үй орналасқан.
Жақында осы үйлердің, атап айтқанда, Байқоңыров көшесі, 46-48 үйлердің тұрғындары редакцияға хабарласқан болатын. Қос үйдің тұрғындарының мәселелері бойынша Сәтбаев қалалық мәслихатының депутаты Луиза Мыңбаеваға хабарласып, халық базынасын жеткізген болатынбыз. Депутат тұрғындармен жүздесіп, бірнеше жылдан бері шешімін таппай келе жатқан түйткілдерді мәселелерге қанықты. Тұрғындар осы мәселелердің түйінін тарқатуға халық қалаулысынан көмек сұрады.
Сондай-ақ оқыңыз
Олар Ерден көшесіне дейін жарықтың жоқтығына, үй қасбеттерінің сапасыз сыланғанына, ойын алаңдарының, Ерден көшесіне дейінгі аралықтағы жолдың жоқтығына және кәріздердің ашық жатуы мен қоқыс орнының қоршауға алынбауына шағымданды. Аталған мәселелерге қатысты депутат Луиза Мыңбаева Сәтбаев қалалық тұрғын үй, коммуналдық шаруашылығы және автокөлік жолдары бөлімінің басшысына депутаттық сауал жолдады.
Тұрғындар тарапынан туындаған мәселелерге қатысты бөлім басшылығы нақты шараларды қолға алып, шешілу жолдарын қарастырады деп сенеміз.
Бағдат ҚАЗКЕНОВ.
