Кең даланың сәні болған киік биыл Жезқазған төңірегін мекендеді. Біздің өңірде жортып жүрген киіктердің қыс мезгілінде қорек ететін азығы болмай, бір тобы аштыққа ұшырауда.
Осыған орай «Қазақмыс Мэйнтенанс Сервисиз» ЖШС Бас директоры Саят Бакиров жауапкершілігі шектеулі серіктестікке қарайтын кәсіпорындардың еңбеккерлеріне үндеу жолдап, киіктерді аман алып қалудың амалдарын ойластырды.
Саят Шарафиденұлының бастамасымен өңірдегі қалған киіктерге 180 бума шөп, 50 қап жем сатып алынып, арнайы орынға жеткізілді.
«Қазақмыс Мэйнтенанс Сервисиз» ЖШС басшылығы мен еңбеккерлері көмекке мұқтаж адамдарға және қоршаған ортаға кез келген жағдайда қолдау көрсету үшін арнайы қор құрды. Осы қорға жиналған демеушілік көмектің нәтижесінде киіктерді амал алып қалуға мүмкіндік тууда.
Ұлытау облысы бойынша Орман шаруашылығы және жануарлар дүниесі аумақтық инспекциясының басшысы Зәкария Тұралиевтің айтуынша, қазір біздің аумақта 2000 бас киік бар. Олар топ болып, әрбір жерде шоғырланған.
– Ұлытау облысы аумағында мекендеп қалған киіктердің ауызы көкке тигенше қолдан келген шараларды жүзеге асырудамыз. «Қазақмыс Мэйнтенанс Сервисиз» ЖШС басшылығы мен ұжымының дала сәніне айналған жануарды аман алып қалудағы бастамалары –көпке үлгі. Жыл сайын Арқа төсіне келетін киіктердің саны өсуде. Дала жануарлары жер бетін жапқан мұздан тебіндей алмауы салдарынан аштыққа ұшыруда.
Әлсіреген киіктерді иттер талап тастаған жағдайлар да кездесті. Осы жайтты ескере отырып, Жезқазған қаласының тұрғындарын қыс мезгілінде иттерді бос жібермеулерін сұраймыз. Киіктер жылы жаққа дер кезінде ығысып кете алмауы себебінен біздің төңіректі мекендеп қалуда. Сондықтан дала жануарына баршамыз жанашырлықпен қарап, қорғауға күш салайық, – деді Зәкария Тұралиев.
Бағдат ҚАЗКЕНОВ.
