«КәсіпҚорған» кәсіподағы Жезқазған филиалы мен «Қазақмыс» корпорациясы» ЖШС еңбеккерлерінің «Jastar Bolashaq» жастар одағы бірлесе ұйымдастыратын дәстүрлі спартакиада аясында волейболдан жарыс мәреге жетті.
«Қазақмыс» Холдинг» ЖШС еңбеккерлерінің басын біріктірген бұл бәсекеге өңірдегі негізгі және қосалқы құрылымнан командалар қатысып, бақ сынады. Жарыс тартысты өтті. Командалар бір-біріне оңайлықпен есе бере қоймады. Ойынның нәтижесінде І орынды Жезқазған байыту фабрикасы жеңіп алды. Жезқазған мыс қорыту заводы ІІ орынды еншіледі. Ғазиз Омаров атындағы шахтапроходкалау тресіне ІІІ орын бұйырды.
Жарыс барысында ерекше ойын көрсеткендер арнайы номинацияларға ие болды. Атап айтқанда, Жезқазған байыту фабрикасының еңбеккері Дастан Исмаилов «Үздік байланыстырушы» атанса, шахтапроходкалау тресінен Ержан Әубәкір «Үздік шабуылшы» атағын иеленді. «Үздік бұғаттаушы» аталымы Жезқазған мыс қорыту заводынан Айбек Қыдырхайыровқа бұйырды. «Транко RT» ЖШС еңбеккері Батыржан Дастановқа «Үздік ойыншы» номинациясы тиесілі деп танылды.
