Облыс орталығында Жанат Хаджиев атындағы ІV халықаралық театрлар фестивалі ұйымдастырылды. Өткен жұманың кешінде басталған өнер мерекесі 5 күнге жалғасты.
Қазақтың көрнекті режиссері Жанат Хаджиев атындағы халықаралық театрлар фестивалі Жезқазғанда дәстүрлі түрлі өткізіліп келеді. Театр өнерін қолдау мен шығармашылық байланысты арттыру мақсатында қолға алынған фестивальдің салтанатты ашылуына аймақ басшысы Дастан Рыспеков арнайы қатысып, фестиваль қатысушыларына сәттілік тіледі.
Бес күнге жоспарлаған фестивальдің құрметті қонағы һәм қазылар алқасының төрағасы белгілі театр және кино актері, Жанат Хаджиевтің үзеңгілес досы болған Тұңғышбай Жаманқұлов болды. Биылғы фестивальде Қазақстан мен көршілес Ресей және Қырғыз Республикасынан 8 театр бақ сынады. Олар өнер додасына өздерінің ең үздік деген қойылымдарымен келген.
Фестивальдің алғашқы күнінде көрермендерге Тахауи Ахтанов атындағы Ақтөбе облыстық драма театрының «Тазының өлімі» спектаклі ұсынылды.
Өнер додасы жезқазғандық көрермендерді түрлі жанрдағы қойылымдармен тәнті етті. Фестивальдің жабылу салтанатына облыс әкімінің орынбасары Зина Ақылбекова арнайы қатысты.
Жанат Хаджиев атындағы ІV театр фестивалінің бас жүлдесі Абай облысының «Дариға-ай» Жастар театрына берілді. Бұдан бөлек, «Үздік ансамбль», «Үздік визуалдық көркемдік бейне», «Үздік әйел рөлі», «Екінші пландағы әйел және ер рөлі» аталымдары бойынша да марапаттар ұсынылды.
Жеңімпаздар мен жүлдегерлерге қомақты қаржылай сыйақы мен дипломдар табыс етілді. Жанат Хаджиев атындағы халықаралық театрлар фестивалінің жыл сайын ауқымы кеңейіп, қатысушылар саны да арта түспек.
Гүлім МАРАТҚЫЗЫ.
