Наурыз – ұлттық құндылықтарымыз жаңғырып, бірлігіміз беки түсетін ұлы мейрам. Ауа райының қолайсыздығына қарамастан облыс тұрғындары мен қонақтары отбасыларымен Алаш алаңына келіп, күн мен түннің теңелген көктемінің басты мерекесін атап өтті.Ұлыстың Ұлы күні Жезқазғанның орталық көшесіне 22 киіз үй тігілді. Жалпы бұл күні облыс бойынша 90-ға жуық киіз үй тігілгенін атап өте кетейік.
Облыс орталығында мереке шымылдығын жаршы жігіттер ашып, елге Наурыздың келгенін сүйіншілей жар салды. Олардың жарқын үнінен кейін сахнаға Жер-Ана бейнесі шығып, көктемнің оянып, табиғаттың жаңарғанын жеткізді. Одан кейін «Қыс кетіп, көктем келгенде», «Қызғалдақтар – қырдың сәні», «Көбелектер – көңіл қанаты», «Құстар, құстар» атты көркемсуретті композициялар сахна төрінде бірінен соң бірі көрініс тапты. Көктем-қыздың келуімен Жер-Ана бүр жарса, Қызыр Ата батасын беріп, тойдың рухани шырайын ашты. Аталар мен әжелердің қауышу көрінісі, шашу шашуы мереке реңін үстемелей түсті.
Наурыз айы – жаңа дәуренді айшықтайтын, өткенді саралап, бүгінгіні бағамдайтын кезең. Биылғы мереке осымен екінші жыл қатарынан «Наурызнама» дәстүрі арқылы қайта жаңғырып, жоғары деңгейде аталып жатыр.Аймақ басшысы Дастан Рыспеков ұлытаулықтарды Наурыз мейрамымен құттықтап,бұл күн береке мен бірліктің, мейірімділік пен өзара сыйластықтың қасиетті мерекесі екенін атап өтті.
– Құрметті жерлестер, Ұлытау – қазақ елінің қасиетті қарашаңырағы. Ұлттың рухани орталығы. Сондықтан біз ата-бабадан қалған аманатты сақтап, өңірімізді одан әрі өркендетуге бар күш-жігерімізді саламыз.Ұлытау облысының одан әрі даму сатысында барлығымыз бірге аянбай қызмет етеміз деген сенімдемін. Наурыз береке мен бірліктің,татулық пен жасампаздықтың символы.Бұл күнде ағайын бір-біріне ақ тілек арнап, құшағын айқара ашады. Көшпелі қазақ өркениетінің символына айналған киіз үйлер тігіліп, ұлттық ойындар мен салт-дәстүріміз дәріптеледі. Осы ұлы мереке сіздерге молшылық пен бақыт әкелсін, әр шаңыраққа амандық, әр отбасына құт-береке тілеймін. Еліміз тыныш, халқымыз аман болсын! Әз Наурыз құтты болсын! – деп облыс әкімі ізгі тілегін жеткізді.
Сондай-ақ оқыңыз
Мереке күні орталық алаңда ұлттық нақышта безендірілген киіз үйлер орнатылып, дәстүрлі тағамдар – киіз үйлер маңында отқа піскен бауырсақ пен наурызкөже келген жұртқа таратылды. Атап өту керек, Жезқазғанда Ұлыстың ұлы күнінде бұлжымайтын дәстүр бар. Жыл сайын ұлттық құндылықтарды дәріптеу мақсатында түрлі сайыстар өтеді. Биыл ұмыт бола бастаған ұлттық тағамдарды дайындау мен асқа бата қайырудан жарыс өтіп, жеңімпаздар сол жерде анықталды. Бұдан бөлек қазылар алқасы киіз үйлердің де арасынан ең үздігін таңдады. Әділқазылар киіз үйлердің жабдықталуы мен жасақталуына, ондағы қойылған ұлттық тағамдарға баға берді.
Қатысушылар киіз үйдің жабдықталуын, ыдыс-аяқ, кебеже мен сандықты орналастыру тәртібін, аңшылық құстың орнын бәрін-бәрін көрсеткен. Ұмыт болған әдет-ғұрыпты жаңғыртқандар да аз емес. Сонымен, Ұлытау облысының денсаулық сақтау басқармасы тіккен киіз үй үздік деп табылып, 700 мың теңгелік сертификатқа ие болды. Облыстық денсаулық сақтау басқармасының басшысы Ләззат Ранова бұл жеңіс барлық медицина қызметкерлерінің қосқан үлесі деп білемін дейді.
– Біз киіз үй сайысында жеңімпаз боламыз деп еш ойламадық. Уық, керегелердің барлығы қолдан жасалынған. Барлық ұлттық салт-дәстүрлерімізді көрсеттік. Біз, өз жұмысымызға асқан жауапкершілікпен қараймыз, бұл сайысқа да сондай жауапкершілікпен қарадық. Қуаныштымыз, әрине. Ұлыс оң болсын, халқымыз аман болсын! – деп Ләззат Ранова тілектестік білдірді.
Мереке күні қолөнер шеберлері өз туындыларын орталық алаңда ұйымдастырылған көрмеге қойды. Келген жұрт ұлттық бұйымдарды көріп, зергерлік өнермен танысты. Ағаш және темір ұсталарының жұмысын бағалады. Бұл күні көрмеге ұлттық аспаптар шебері Сарыбас Жүнісов өзінің қолынан шыққан туындыларды әкелген.
– Өзім 30 жылдың көлемінде аспаптар жасаумен,оның ішінде домбыра жасаумен айналысып келе жатырмын.Осының арқасында «Мәдениет саласының үздігі» атандым,«Еңбек даңқы» медалін алдым. Шәкірттерім де жетерлік. Олардың да туындыларын бүгінгі көрмеге әкеліп тұрмын. Ең бастысы – халықтың алғысы. Осындай көрмелеріміз алдағы уақытта да көп болсын. Ұлттық мерекеміз құтты болсын,– деді ұлттық аспаптар шебері Сарыбас Жүнісов.
Алаңға ағылған қала тұрғындары құрылған сайыс алаңына жиналып, ұлттық ойындарды тамашалады. Оның ішінде жігіттер қауымы күресіп, кір тасын көтеріп, қол күрестіріп, таяқ тартып өзара бақ сынаса, балалар асық ойнап, садақ атып сынға түсті. Бозбала мен бойжеткендер алтыбақан маңында басқосты. Алаңда ұйымдастырылған қазақтың ұлттық ойындарын қызықтап мәз-мейрам болғандардың да қатары қалың.
– Наурыз мейрамы біздің Жезқазғанда жыл сайын үлкен ауқымда тойланады. Бәрі өте керемет ұйымдастырылған, наурызкөжеден дәм таттық. Керемет концерттің куәгері болып, жарыстарға да қатыстық, – деді Бекзат есімді қала тұрғыны.
Ұлытаудың мерекесіне Астана, Тараз сияқты өзге аймақтан тұрғындар келіп қатысты. Арнайы алаңда атқа мініп, серуен құрды. Әжелеріміз кимешек,ерлер жағы оюлы шапан киіп, Наурыз тойының сән-салтанатын арттыра түскен. Барлығының тілегі бір – елдің амандығы. Кенді өңірдегі Наурыз мерекесі төрімізге осылайша жайғасты.
Гүлім МАРАТҚЫЗЫ.
