Ер азамат әскер қатарында қызмет етіп, Отан алдындағы парызын өтеуге міндетті, себебі туған жерді, елді, атамекенді қорғау – қасиетті борыш. Өзін ер азаматпын деп санайтын кеудесінде ар-намысы, бойында жігері, жүрегінде оты бар әрбір жігіт үшін ең басты парыз, ең басты
міндет осы.
Ата-анаға баладан қымбат не болсын. Әрбір ата-ана перезентінің аман болып, көз алдында жүргенін қалайды. Мен де ұлым Ержанды әскерге аттандырғанда қатты қобалжып, уайымдағаным рас. Баламды әскер қатарына шығарып салып тұрып, оның сапарына сәттілік тілеп, елдің қауіпсіздігі үшін қандай да болмасын қиындықтарға төзіп, өзіне деген жауапкершілікті сезініп, қолына қару алып, оны пайдалану жолдарымен жете таныса білсін дедім.
Өз еркімен әскерге барған ұлым салтанатты түрде әскери ант қабылдап, Алматы қаласында орналасқан №7552 Ұлттық Ұлан қатарын толықтырғанда, кеудемді мақтаныш сезімі кернеп тұрды. Ұлым Ержанның әскери борышын адал атқарып жатқанына, жауынгерлік қызметтегі жоғары көрсеткіштеріне, үлгілі тәртібіне және де әскери антына адалдығына № 7552 әскери бөлімнің командирі Р. Ибрагимовтың берген Алғыс хаты айқын дәлел бола алады.
Өз хаттарында әскери өмірі мен казармадағы қызықты күндерін айта келе ұлым Ержан өз сөзінде Қазақстанның әр аймағынан жиналған жастармен бір бауырдай болып кеткенін, жаңа достар тапқанын айтады. «Әскери орта – әрбір ер азаматты нағыз ерлікке, шынайы достыққа және адалдыққа тәрбиелейді. Әскер бізді шынықтырады, шыңдайды. Алға қойған арманым көп, соның бірі өз еркіммен Отан алдындағы азаматтық борышымды адал өтеп, еліміздің қауіпсіздігі үшін өз үлесімді қосу. Көп арманымның бірі орындалып жатқанына қуаныштымын!» – деп жазады.
Әскери борышын абыроймен өтеу ұлым Ержан үшін үлкен сын. Сол сыннан сүрінбей өтіп, ел қауіпсіздігі үшін абыройлы қызмет етіп оралатына сенімім мол. Отанымыздың қорғаушылыры – ер азаматтардың жолдары әрдайым ашық болсын. Туған еліміз егемен Қазақстан жайқалып гүлдей берсін, балаларымыз бейбіт күнде өз отбастарына аман-есен оралсын деп тілеймін.
Қажымұқан Темірбек.
