Жезқазған қаласының 70 жылдығына арналған мерейтойлық іс-шаралар легі жалғасын табуда. Бұл жолы Кеңгір ауылындағы атшабар алаңында ұлттық спорт түрлерінен үлкен фестиваль өтті.
Аталған спорт фестивалін өткізудегі негізгі мақсат ұлттық ойын түрлерін насихаттап, кейінгі ұрпаққа дәріптеу болды. Сонымен бірге ұлттық спортта Ұлытау облысының намысын қорғап жүрген қыз-жігіттерге қолдау көрсету еді. Фестиваль қатысушыларын қала әкімінің орынбасары Бақытжан Жайлаубаев арнайы құттықтап, қатысушыларға сәттілік тіледі.
Фестивальге Жезқазған, Сәтбаев, Қаражал қалалары мен Жаңаарқа, Ұлытау ауданының командалары қатысты. Олар көкпар, аударыспақ, қазақ күресі, асық ату, садақ ату, теңге ілу, арқан тартыс, тоғызқұмалақ сияқты жарыс түрлері бойынша мықтыларды анықтады.
Ақшаңқан киіз үйлер тігіліп, ұлттық өнер мен мәдениет те салтанат құрған фестиваль биыл облыс орталығында екінші мәрте ұйымдастырылды. Жарыс жеңімпаздары мен жүлдегерлері қаржылай сыйақымен марапатталды. Ал, көптің делебесін қоздырған көкпарда бас жүлде – 1 млн теңгені Қаражал қаласының командасы қанжығаға байлады.
Гүлім МАРАТҚЫЗЫ.
