Тәуелсіздік мерекесі қарсаңында ҚР Үкіметінің қаулысымен «Ұлытау» мемлекеттік ұлттық табиғи паркінің құрылуы өңірдегі айтарлықтай қуанышты оқиға ретінде бағалануда. Бұл – еліміздегі осындай бағыттағы 14- құрылым болып табылады.
Ұлттық табиғи парк құру туралы жобаны ұлытаулықтар көптен бері көтеріп, ұсыныс жасап жүретін. Мемлекет басшысы Қасым-Жомарт Тоқаев өңірде өткен «Ұлытау-2019» халықаралық туризм форумына қатысуға келген сапарында ұлтымыздың тарихи мекені, қасиетті Ұлытауға ерекше көңіл бөлуді міндеттеген болатын. Ұлттық табиғи парктің құрылуы Президенттің осы тапсырмасын жүзеге асыруға байланысты жасалған игі қадамның бірі болуға тиіс. Аумағы 58,9 мың гектарды қамтитын парк табиғи кешендегі биологиялық және ландшафтық ерекшеліктерді сақтап, сирек кездесетін өсімдіктері мен жануарларды қорғау мақсатында құрылып отыр.
– Ұлттық парк – айрықша экологиялық және ғылыми маңызға ие болады. Этнотуризмді дамытуға септігін тигізеді. Осы өңірдегі бұрынғы жануарлар әлемін қалпына келтіру бағытында жұмыстар жүргізіледі. Осы салада жұмыс істейтін қорықшыларды дайындап, оқытып-үйрету іске асырылмақшы. Аудан көлемінде 70-ке тарта жаңа жұмыс орыны ашылатын болады, – дейді осы істің ойдағыдай жүзеге асуына ұйтқы болып жүрген Парламент Мәжілісінің депутаты Берік Әбдіғалиұлы.
Иә, Ұлттық табиғи парктің өмірге келуі ұлт ұясы Ұлытаудың тарихи және табиғи ерекшеліктері мен экожүйесін сақтай отырып, туризмді дамыту жөніндегі қолға алынып жатқан жобаларына соны серпін берері анық.
Өз тілшіміз.
