Облыс орталығындағы қалам қайратына сүйеніп, шығармашылықпен айналысып жүрген жас таланттардың бастамасымен «Ұлар» әдеби клубы құрылды. Клуб Қазақстан Жазушылар одағының облыстық филиалы жанында жұмыс істейтін болады.
– Мұндағы негізгі мақсатымыз – ең алдымен шығармашылық адамы ретінде өзімізді жоғалтып алмау және өлеңге таласы бар қыз-жігіттермен қатарымызды көбейту. Әдеби клубтың төрағасы етіп Абай Оразды сайладық. Клуб құрғанымызды ести сала Жаңаарқа ауданы мен Қаражал қаласы әкімдерінің орынбасарлары Әсет Аманжолов пен Ақжол Құрмансейіт «елге келіп кетіңдер» деп қуантып тастады, – дейді ақын Мұқағали Сейтқазы.
Бүгінгі таңда «Ұлардың» құрамында 15 шақты ақын қыз-жігіттер бар екен. Әдеби клубтың құрылуына Кенжебай ағамыздың 60 жылдығына арналған апталықтағы жыр кешінде басқосуымыз түрткі болды дейді жастар бірауыздан. Алайда, ақындардың алқалауымен құрылған әдеби орта прозашыларды да шеттетпейтін шығар деп, клуб тізгініне ие болған ақын Абай Оразбен тілдескен едік.
– Әдеби клуб болған соң әрине, әдебиет жанрларының қайсына болмасын бой ұрған талапкерлерді біз өз қатарымыздан көргіміз келеді. Бұйырса, облыс аумағын аралап, ел ішіндегі шығармашылыққа бет бұрған, бойында оты бар деген жаңа есімдерді іздейміз. Маршрутымыз бекітілді. 22 қараша күнгі Қаражал мен Жаңаарқадағы «Жайлауы жас қаламның – албырт сезім» атты поэзия кешінен кейін желтоқсанның басында Ұлытау ауданы мен Сәтбаев қаласына барып бас қосамыз. Клубымыздың «Ұлар» аталуы айтпаса да түсінікті болар. Ұлытау мен Ұлар – егіз ұғым ғой. «Әдебиет – ардың ісі» деген қанатты сөзге сүйенер болсақ, Ұлы Ар деген ұғымға да саяды, – дейді шығармашылық жастар қауымының жетекшісі.
Сондай-ақ оқыңыз
Жастар әдеби клубтың ашылу рәсімін 13 желтоқсанда театрда өткізуді ойластырып отыр. Оған Қарағандыдан бір топ ақын келеді деп күтілуде. Қалай болғанда да, облыс орталығында шығармашылық қауымның бас қосатын ортасының құрылуы сүйінішті жағдай. «Ұлар» – Ұлытау өңіріндегі әдеби ортаның қалыптасуын қамтамасыз етіп, жас таланттар шоғырын қанаттандыруға игі ықпалын тигізеді деп үміттенеміз.
Амандық РАХҰЛЫ.
