Жезқазған өңіріндегі БАҚ өкілдері қызметкерлерінің кәсіби мерекесі биыл да сән-салтанатымен атап өтілді. Өндірістің, еңбек адамының жаршысына айналған «Мысты өңір» газетінің шығармашылық ұжымына деген ыстық ықыластарын мереке күні бірқатар ұйымдар мен Жезқазған қалалық әкімдігі білдірді.
Ұжымды құттықтай келген «КәсіпҚорған» кәсіподағы комитетінің Жезқазған филиалы төрағасының орынбасары Сержан Жақсыбеков мыстыөңірліктердің еңбегіне табыс тілей келе, бірқатар қызметкерге филиал төрағасының атынан Алғыс хат пен сыйақы тапсырды. Өндірістік басылымға деген сый-құрметтерін «Қазақмыс» корпорациясы» ЖШС еңбеккерлерінің «Jastar Bolashaq» Жастар одағы да көрсетті. Төрағаның орынбасары Азамат Оразалы мерекелік құттықтауын арнайы келіп марапаттарын тапсырды. Қос ұйым да басылыммен байланыстың беки түсетінін жеткізді.
«Amanat» партиясы «Қазақмыс» корпорациясы» ЖШС жанындағы Ұлытау облыстық филиалының атқарушы хатшысы Асқар Нұржанов бастаған филиал қызметкерлері де Арқа журналистерін ұлықтауды ұмыт қалдырмады. Аға буын мен жас толқын журналистердің басын қосқан жиында Асқар Сембіғалиұлы басылымдар мен телеарна қызметінің қоғамдағы рөліне тоқтала келіп, филиал атынан бір топ БАҚ өкілін марапаттады. Солардың қатарында біздің газеттің де қызметкерлері бар.
Сондай-ақ оқыңыз
Сонымен қатар, БАҚ өкілдерінің мерекесінде Жезқазған қаласы әкімінің орынбасары Бақытжан Жайлаубаев ұжымға арнайы келіп, құттықтауын арнады.
Жалпы алғанда, мерекедегі бұл марапаттар біздің «Мысты өңір» газеті ұжымының мерейін асыра түскенін атап айтқан лазым.
Бағдат ҚАЗКЕНОВ.
