2025 жылдың 22 мамырында екіжақты комиссияның үйлестірілген және сындарлы жұмысының нәтижесінде «Қазақмыс Мэйнтенанс Сервисиз» ЖШС-нің 2025 – 2029 жылдарға арналған ұжымдық шартына қол қою рәсімі өтті.
Құжатқа Бас директор Саят Шарафиденұлы Бәкіров бастаған екі тараптың өкілдері қол қойды. Шара барысында Саят Шарафиденұлы комиссия мүшелеріне және кәсіподақ ұйымдарының тарапынан атқарылған жұмыстарға ризашылығын білдіре келіп, еңбек құқықтары мен серіктестік мүдделерін қорғауда ашық диалог пен бірлескен күш-жігердің маңыздылығына тоқталды.
– Жұмыс беруші мен жұмысшы арасындағы дәнекер ретінде кәсіподақ ұйымдарының атқарып отырған жұмысы маңызды. Кез-келген істе бірлесе шешім шығару арқылы біз оң нәтижеге жетеміз. 2025 – 2029 жылдарға арналған ұжымдық шарттың қамтып отырған салалары ауқымды. Бес жыл ішінде біз шартта көрсетілген мақсат-міндеттерді орындауға мүдделіміз. Сіздердің жүзеге асырған сындарлы бастамаларыңызға алғысымды білдіремін, – деді Саят Бәкіров.
