Жаңажылдық сауалнама
‣ Өткен жыл несімен есте қалды?
‣ Жаңа жылдан не күтесіз?
Рақым ӘЖБЕН, бұрғылаушының көмекшісі:
Тарих қойнауына кеткелі тұрған бұл жылдың мен үшін орны бөлек. Өйткені, Барыс жылы адам өміріндегі ең бір жауапты белес саналатын еңбек жолымды бастадым. Тұсауымды кен қорының көлемі мен оның сапасы жағынан Арқада айрықша орны бар «Жомарт» кенішінің кескенін жақсы ырымға балап отырмын. Жарты жылға жуықтап қалды өндірістік тәлімгерім, білікті бұрғышы Жақсылық Төреқожиннің басшылығымен түсімі өнімді шпур бұрғылаудың қыр-сырын меңгеріп келемін.
Әрине, әр еңбек ұжымының өзіндік ерекшелігі болады. Оны ешкім жоққа шығармайды. Ал, жүздеген метр тереңдікте, білетіндердің айтуына қарағанда, алты жүз метр жер астында жұмыс істеу қандай болатынын сол ортада жүргендер ғана түсінеді. Оның үстіне біз вахталық тәсілмен еңбек етеміз. Жарты ай жер астында жүреміз десек те болады. Осы он бес күннен кейін кездескенде бір-бірімізді қаншалықты бауыр басып қалғанымызды қалай сезінетінімізді сөзбен айтып жетткізу қиын.
Алда Қоян жылы. Ел аузында осыған байланысты әртүрлі әңгіме бар. Өзім осы жылда да белгіленген биіктен көрінетінімізге сенемін. Шахта шыңырауында еңбек көрігін қыздырған әріптестеріме тек сәттілік тілеймін.
