Бүгінгі таңда мемлекеттің экономикасына қозғаушы күш ретінде басымдық берілген көлік саласының ел дамуындағы рөлі өзге салалардан кем түспейді.
Тамыздың бірінші жексенбісінде төл мерекелерін атап өткен кәсіп иелеріне деген құрмет «Транко Жез» ЖШС кәсіпорнында көрініс тапты. Мұндағы «КәсіпҚорған» кәсіподағы комитеті мен кәсіпорын басшылығы теміржол саласына ұзақ жыл еңбек сіңірген аға буынның еңбегіне ыстық ықылас білдірді.
«Транко IRT» жауапкершілігі шектеулі серіктестігінің Бас директоры Алексей Каташев және «Транко Жез» жауапкершілігі шектеулі серіктестігінің Бас директоры Рахым Хамитов, «КәсіпҚорған» кәсіподағы Жезқазған филиалының бас техниалық инспекторы Шәкен Кененбаев құттықтауларын жеткізді.
Кәсіподақ ұйымы атынан Шәкен Жұмабекұлы теміржол қызметіндегі айрықша үлесі үшін дабыл, орталықтандыру және бұғаттау құралдарын жөндеу және қызмет көрсету жөніндегі электрмонтер Қонай Шығанбаевқа ІІ дәрежелі «Еңбек даңқы» төсбелгісін тапсырды.
Сондай-ақ оқыңыз
ІІІ дәрежелі «Еңбек даңқы» төсбелгісін электр-газбен дәнекерлеуші Саят Әбеуов, аға жол монтері Өмірхан Әжібеков, тепловоз машинисі Илнар Сабыров, жылжымалы құрамды жөндеу жөніндегі аға слесарь Мұрат Қоңқабаев пен аға пойыз құрастырушы Ернар Мәткенов омырауына тақты.
Сондай-ақ, сала мамандарына «КәсіпҚорған» кәсіподағы Жезқазған филиалының аппарат жетекшісі Жанар Салықова «Кәсіподақтың Құрметті қайраткері», «Еңбек даңқы» төсбелгілерін табыстады. Аталған мараппатарға ие болғандардың қатарында вагон депосының аға шебері Самат Әлімбетов, тепловоз машинисі Саламат Жакупов, жол шебері Жанболат Жұмабаев, электр-газ дәнекерлеуші Нұрболат Алтынсариев бар.
Мереке иелеріне өзге де құрылымдар мен ұйымдардың өкілдері құттықтауларын арнап, сый-құрмет көрсетті.
Бағдат ҚАЗКЕНОВ.
