Жезқазғанды өзге өңірлермен жалғайтын республикалық маңызға ие күре жолдарда мобильді байланыс жоқ. Әсіресе, боранды, жауын-шашынды күндері жолаушыларға қиын.
Жезқазғанды өзге өңірлермен жалғайтын республикалық жолдардың бойында байланыс жоқ. Ұлытау өңірі 6 облыспен шектеседі.Мысалы, Жезқазған – Қызылорда тас жолы. Арасы 420 шақырым. Жолдың машақаты белгілі. Жанар-жағармай құю бекеті де жоқ екі арада. Оған ұялы байланыстың жоқтығын тағы қосыңыз.
Жезқазған – Қарағанды күрежолында да байланыс кейбір жерлерде ғана ұстайды. Мәселе «Қолжетімді интернет» ұлттық жобасы аясында шешіледі. Үкімет 2027 жылға дейін облыстағы 650 шақырымнан астам жолға ұялы байланыс пен интернет тартып беруге дайын. Ол үшін күре жолдардың бойына 15 діңгек-антенна орнатылады. Әзірге жетеуінің құжаттары дайын. Бірер жылда Қарағанды мен Арқалыққа баратын жолға байланыс тартылады. Алайда, Қызылорда тас жолында электр желісі жоқ. Сондықтан мәселе әзірге күн тәртібінде тұр.
– Бізге қазіргі таңда министрлік тарапынан күн панельдерін орнату ұсынысы келді. Дегенмен, бұл ұсынысты операторлар қабылдамайды. Себебі, күн панельдерін республикалық маңызы бар трассаларға қою әлі практикада болмаған. Біз оның сапасына сенімді емеспіз. Биыл Жезқазған – Қызылорда тас жолына жөндеу жұмыстары басталды. Тиісінше, республикалық маңызы бар жол болғаннан кейін, электр желісі керек-ақ. Сондықтан цифрлық технологиялар басқармасы басқа да жолдарын іздестіруде, – дейді Ұлытау облыстық цифрлық технологиялар басқармасының бас маманы Аружан Сәтбекова.
Гүлім МАРАТҚЫЗЫ.
