«Қазақмыс» корпорациясы» ЖШС жанындағы Ардагерлер кеңесі Жеңістің 80 жылдығы аясында Кеңес Одағының Батырлары Николай Колбасов пен Анатолий Живовты еске алудан дартс пен шахматтан жарыс өткізді.
Кеңес мүшелігіндегі ардагерлердің сұранысы бойынша өткен қос жарысқа жиырмадан аса ардагер қатысты. Өндірістің әр буынында еңбек еткен ардагерлер өзара бәсекеге түсіп қана қоймай, емен-жарқын әңгімелесіп, бір марқайып қалды.
Николай Колбасовтың құрметіне арналған дартс ойынынан өткен жарыста І орынға тігілген 20 мың теңгені Эдуард Каримов жеңіп алса, ІІ орынның жүлдесіндегі 15 мыңды Станислав Абрамов еншіледі. ІІІ орынның 10 мың теңгесі Жақсылық Жақабаевқа бұйырды.
Анатолий Живовтың жүлдесіне шахматтан тігілген 20 мыңды Эдуард Каримов алса, Есен Төремұрат 15 мыңмен марапатталды, ІІІ орынның 10 мың теңгесі Асылхан Арыстанбековке бұйырды.
Жарысқа қатысқан барлық ардагерлерге «Қазақмыс» корпорациясының демеушілігімен жарыққа шыққан Баубек Бұлқышевтың «Өмір сүргім келеді» жинағы мен Бауыржан Момышұлы жайындағы кітап табыс етілді.
