Өндірісті өңірдің күретамырына, экономиикасының негізіне айналған қара және түсті металлургия саласының озаттарын ұлықтау шарасы мысты шаһарда кең ауқымда өтті.
Кәсіби мерекеде «Қазақмыс» корпорациясы» ЖШС «Жезқазғантүстімет» ӨБ-не қарасты құю-механикалық зауытында өндірістің үздіктерін үкілеу шарасы түрлі марапаттар тапсырумен астасты.
Жиналған көпшілікті зауыт директоры Ғани Пірекенов құттықтап, әріптестеріне жылы лебізін арнады.
– Алып мыс өндірісін қалыптастырып отырған «Қазақмыс» компаниясының өнімі әлемдік деңгейде сұранысқа ие. Осы тұста сапалы өнім өндіру ісіне атсалысқан металлургтердің еңбегі орасан зор. Біздің құю-механикалық зауыты өндірістік жоспарды орындауда әрқашан табысқа қол жеткізіп келеді. Бұл еңбек ұжымының бірлігінің арқасы. Мен сіздерді мақтан тұтамын, – деді Ғани Елубайұлы.
Мұнан соң «Amanat» партиясының «Қазақмыс» корпорациясы» ЖШС жанындағы Қарағанды филиалының өкілі Әлия Өксікбаева сөз алып, бір топ еңбек озатын марапаттады.
Металлургтердің өндірістегі қолдаушысына айналған «КәсіпҚорған» кәсіподағы Жезқазған филиалының төрағасы Ақылбек Төлепбергенов:
– Аймақ өндірісінде өзіндік орны бар, шежірелі тарихы қалыптасқан құю-механикалық зауыты – табыстың тайқазанын тасытып отырған кәсіпорын. Біз Сіздердің ерен еңбектеріңізді әрқашан қолдаймыз, – дей келіп, өндіріс озаты Болат Наурызбаевқа бірінші дәрежелі «Еңбек даңқы» төсбелгісін тапсырды. Сонымен қатар Ақылбек Төлепбергенұлы кәсіподақ төрағасы Ерболат Сатыбалдиннің Құрмет грамотасымен Айгүл Карбозованы марапаттады. Филиал төрағасының Құрмет грамотасына Ғазиз Пірекенов, Данияр Зиядан, Бауыржан Мизамбаев ие болды.
Зауыттағы кәсіподақ комитетінің төрағасы Асқар Құлмағамбетов комитет атынан 15 жұмысшыны марапаттады.
Құю-механикалық зауытындағы «JastarBolashaq» жастар одағының төрағасы Уәлихан Елемесов әріптестеріне жылы лебізін арнай келіп, Ерғали Әбітай, Ербол Орынбаев, Досбол Спатаев, Медиғат Жамалов, Сұлтанов Жиенбек сынды жастарға марапаттар тапсырды.
Осы орайда айта кетейік, дүйсенбі күні зауыттың озат еңбеккері Еркін Ертісбаев үшінші дәрежелі «Еңбек даңқы» төсбелгісіне ие болса, Ильшат Вильдановке Кен өндірісі және тау-кен металлургия кәсіпорындары Ассоциациясының Құрмет грамотасы тапсырылды.
Табысты тасқындатқан тарландарға марапаттарыңыз құтты болсын демекпіз.
Бағдат АЙТӨРЕҰЛЫ.
